Real chak zanah lawm a kim lo

Champions League-a an tlawm hnu lawkah league match khelin Real Madrid an inlan a, tun season-a beisei phak baka result nei ṭha Villarreal chu 2-0 in an hneh - Real tan Federico Valverde leh Vinicius Junior ten goal khat ve ve an khung a, mikhual team-in a chhanletna tur an neih loh avangin an tlawm.

Mahse, Real chak zanah an duhthusam angin thil a thleng vek bik lo. Defender pawimawh Dani Carvajal chu khup hliam vangin lakchhuah a ngai a, ACL a nih avangin Spanish defender hi tun season-ah a lo kir leh thei kher ang em, sawi chian theih a la awm rih lo.

Nizan khan Real elpui, hmahruaitu Barcelona leh Atletico Madrid-te an inlan a, he thu buatsaih a nih lai hian result kan hre hman lo - Real leh Barca hi an point hmuh zat a inang mek a, nizan Barca result-a zirin a danglam lehnghal ang.

Real an tho

Madrid derby-ah Atletico nen an inhnehtawk a, Champions League-ah French club vantlang Lille chu 1-0 in an ngam lo zui - Real an chau a, fan-ten an hlauthawng. Mahse, La Liga khel tura an lo kir leh meuh chuan Real an tho chiang hle.

Minute 14-na lekah Federico Valverde shot chuan Alex Baena perin, goal-ah a lut a, minute 73-naah Vinicius chuan chak nemnghehna goal a khung. Real an hmachhawn hmaa league match khat chiaha tlawm Villarreal hian si phurh sutna remchang an nei a, mahse, an chhawr lo.

Season duhawm tak hmangtu Nicolas Pepe chuan crossbar-a tauh per a, Thierno Barry chuan hnai tak aṭangin a tauh over bawk. Yellow Submarine hian Aurelien Tchouameni-a'n Barry a tihtluk vangin penalty hmuah a inngai a, mahse, Barry a lo offside hlauh - Baena freekick pet lut lo pawh uiawm a tling.

Thawnthu ngaihnawm

Real tana chanchin lawmawm lai chu match hnih a zawna an chak zawh loh hnuah hnehna an chang leh ta hi a ni a, Villarreal chance neih kan sawi rualin Madrid khaw club hian goal dang khung theihna chance pawh an nei nual.

Mahse, Spanish champion tan Antonio Rudiger chuan uiawm takin a tauh over a, season hmasaa Real tana goal 23 khungtu Jude Bellingham pawhin tun season-ah goal a la khung lo tluang zel - uiawm takin chance a hlah.

Real hi La Liga match 41 zet chu tlawm nei loin an kaltluang ta a, hetih chhung hian vawi 30 hnehna changin, vawi 11 draw an nei a, kum 2018-a match 43 chhung tlawm nei loa kal Barcelona record an hnaih ta hle - Barca hi khatihlai khan vawi 34 chakin, vawi kua draw an nei.