Conte enkawl Napoli an sang zel

Antonio Conte enkawl an nih hi chuan a danglam ṭhin - Napoli chuan Zirtawpni zan khan an mikhual Como chu 3-1 in an hneh a, kai thar team tan Naples club an la thiam mah mah.

Diego Maradona Stadium-a inkhelah Napoli tan hian Scott McTominay, Romelu Lukaku leh David Neres ten goal khat ṭheuh an khung, mikhual team tan Gabriel Strefezza chuan goal khat nei ve mah se awmzia a nei phak tawh lo.

Manchester United aṭanga Napoli zawmtu McTominay hian inkhel ṭan aṭanga second 25-na lekah goal hmahruai a khung a, a siamsaktu chu Lukaku a ni - Belgium international striker Lukaku tho hian Neres tan pawh a siamsak a ni.

Napoli manager Conte chuan, "Napoli awmna hi kan hmun tur dik tak a ni em tih ka sawi thei lo, mahse hmahruaitu kan ni tih erawh tunah chuan ka sawi thei thung. A nihna takah chuan thla thum liam ta mai kha tuna kan awmna tur hi miin min hrilh lawk ni se la ka awih kher lo ang.

"Kan khelh dan tur phung a nghet chho tial tial a, hun rei lote chhunga kan insiamrem dan hian min ti lawm hle a ni. Chak turin hmanraw hrang hrang kan mamawh a, kan duh ang kan nei chho mek zel," tiin a sawi.

Inrinni zan khan Serie A champion Inter Milan an inlan ve thung - Inter hian Marcus Thuram-a goal thum hmangin an mikhual Torino chu 3-2 in an hneh a, an nomawi humhim turin an ke chheh an ti rem ve mek zel.

Tun season Serie A match sarih an khelh tawh chinah Inter Milan hian point 14 neiin pahnihna an ni mek a, an chungah hian hmahruaitu Napoli chu point 16 neiin an awm thung - match khat lekah an dinhmuna la danglam thei tihna a ni.