Sanghai-ah player langsar an chak

Tennis inelna Sanghai Masters khelh ṭan a ni a, mipa player langsar leh champion tura rinkai - Novak Djokovic, Carlos Alcaraz leh Jannik Sinner te chuan an match hmasa berah hnehna an chang.

Kum 37 mi Djokovic chuan Alex Michelsen lakah fiahna a hmachhawn nghal - American player hi world number 43-na daih ni mah se bul a ṭan fuh hle a, game hmasa pathum a la phawt.

Mahse, tawnhriat nei ṭha Djokovic a chiai duh lo - inkhel a zawh meuh chuan Serbian tlangval hian 7-6 (7-3), 7-6 (11-9) in hnehna a chang a, a match hmasa ber chu awlsam takin a paltlang bik lo.

Grand Slam vawi 24 champion tawh Djokovic chuan, "Alex nen hian kan intawn vawi khatna a ni a, a nihna takah chuan a khelh dan hmang hrethiam tur khan hun ka mamawh a ni. Player ṭha a nihzia chu rei lote chhung khan ka hre thei," a ti.

China Open champion hlim Alcaraz chuan tualchhung tlangval Shang Juncheng chu 6-2, 6-2 in an hneh ve thung a, tun hnaiah Spanish tlangval hi a zawnin match 10 chhung a chak tluang ta chiah.

Kum 21 mi Alcaraz hian China Open a lak hma khan Laver Cup-ah Team Europe chu a hlawhtlinpui a, US Open aṭanga a tlak hnuah nasa takin a insiamṭha a ni.

World number 1 Sinner pawh Alcaraz a hneh loh hnua a match hmasa berah a chak - Italian tlangval hian Japanese player Taro Daniel chu 6-1, 6-4 a hnehin second round a inhlangkai ve bawk.

Tennis inelna huangah Grand Slam pali te chu ngaihhlut hlawh an ni a, a dawtah Masters 1000 te chu dahsan an ni a, heng zingah hian Sanghai Masters pawh hi a tel a ni.