Bagan an chak; East Bengal an tlawm zel!

Indian Super League pawh khelh chhunzawm zel a ni a, Inrinni zan khan Kolkata club pathum Mohun Bagan, East Bengal leh Mohammedan SC an inlan vek a, chak awmchhun chu Bagan an ni.

Bagan hian Mohammedan chu 3-0 in an sawp a, Jamie Maclaren, Subhasish Bose leh Greg Stewart ten goal khat ṭheuh an khung a, I League champion-in a chhanletna tur an nei lo.

Bagan tan Lalengmawia Ralte (Apuia) a khel tluan a, Mohammedan lamah captain Zodingliana Tochhawng, Vanlalzuidika Chhakchhuak leh Lalremsanga Fanai ten inkhel bul an ṭan vek a, Lalrinfela Khiangte chu bench aṭangin a lut bawk.

Khalid Jamil-a enkawlna hnuaiah Jamshedpur FC pawh an kal zel a, East Bengal chu 2-0 in an hneh. Men of Steel tan Rei Tachikawa chuan goal hmahruai a khung a, Mizo defender Lalchungnunga chuan an lamah a tilut bawk a, an tlawm.

Kolkata club tan Chungnunga bakah David Lalhlansanga a inlan bawk a, David-a hi minute 80-naah luhtir ve chauh niin, East Bengal tana danglamna thlen turin a tan hun a tam tawk tawh lo.

Zirtawpni zan khan ISL inkhel awmchhunah goal ruk a lut a, FC Goa leh NorthEast United chu 3-3 in an inhnehtawk. Goa khelmualah NorthEast tan Nestor Albiach-a goal hmahruai chu Goan club hian Armando Sadiku-a goal hnih hmangin an chhanglet.

Highlander hian an hnufual hnuah Nestor Albiach leh Alaeddine Ajaraei hmangin an khung leh a, rei tak chu 3-2 a ni. Mahse, hun pek belh minute linaah Borja Herrera chuan khung ve lehin, 3-3 in inkhel a tawp.

FC Goa tan Dinthar tlangval Ayush Chhetri chuan inkhel bul ṭanin, Mizoram player inlan dang an awm lo.