Dortmund & Leverkusen chak zo lo!

Bundesliga hmahruaitu Bayern Munich tan chanchin lawmawm hriat tur a awm a, league nomawi dawng tura an elpui ber Borussia Dortmund leh Bayer Leverkusen te kartawp inkhelah an chak zo lo - nizan khan Bayern Munich hi an inlan ve leh a, an result kan hre hman lo.

Keini lam sanaa Inrinni zing inkhelah Borussia Dortmund chuan Union Berlin an lenchilh a, Champions League-a 7-1 ngawta Scottish champion Celtic sawptu team hi an phur vanglai takin Union Berlin hian 2-1 in an lo hneh.

Mualneitu Berlin hian Kevin Vogt (penalty) leh Yorbe Vertessen goal hmangin 2-0 in hma an hruai hman a, Dortmund tan Julian Ryerson chuan goal khat khung ve mah se, awmzia a nei thui lo - league match ruk an khelha vawi hnih an tlawmna a ni a, champion tum tan a lawmawm lo.

Hetihlai hian season hmasaa tlawm nei loa champion Leverkusen 'puja' a fuh hleithei bik lo. Xabi Alonso enkawl team hi 2-0 a hma an hruai hnuah an tawlhthlu a, kai thar Holstein Kiel nen 2-2 in an inhnehtawk.

Leverkusen hian minute riat chhungin Victor Boniface leh Jonas Hofmann hmangin goal an khung a, 2-0 a ni. Mahse, Kiel tan Max Geschwill chuan first half hun pek belhah si phurh a sut ṭhen a, Jann-Fiete Ar chuan minute 69-naah penalty hmangin a sut zo.

Team pahnihin goal an khung tawh lo a, point an insem. Kiel tan tun season-a point hnih an hlawhchhuah vena chiah a ni a, Leverkusen tan match ruka vawi hnih draw an neihna a ni ta - vawi khat an tlawm a, vawi hnih draw an nei.

Nizan khan Bayern Munich chuan khualmualah Eintracht Frankfurt an lenchilh a, result kan hre hman lo - team pahnih hi an inkarah point khat chauh a awm a, a chak zawk chu Bundesliga hmahruaitu an nih chhunzawm ang.