Zanin dar 8:00-ah MPL11 semifinal en châkawm zawk : Chanmari FC Vs Mizoram Police

LZ Juice MPL11-ah zanin dar 8:00 hian champion lai Mizoram Police leh I League 2 inpetkai hlim Chanmari FC te an inkhel dawn a inkhel en châkawm bik a ni. MPL11-ah Chanmari FC hian pahnihna dinhmun luah mah se semifinal chinah boruak a danglam ṭhin a, Mizoram Police hian MPL10 final leh kumin I Day Football semifinal-ah an hneh ve ve tih hriat a ṭha.

Thil awm dan

Season liam ta khan Chanmari FC-in MPL nomawi chawi ngei tumin player ṭha an la khawm a, final hial thlengin nomawi inchuhnaah pawh rinkai zawk ni mah se Mizoram Police lakah an tlawm. Chanmari club thuneituten hian ngaihtuahna thar an seng a, MPL11-ah chetsual nawn tum loin MPL-a vawi thum champion tawh coach Lalsangzuala Hmar chu hma takah an lalut.

Chanmarians hian team an din hma a, MPL-ah pawh bul an ṭan ṭha. Mahse, Sanga kaihhruai Chanmari hian kumin I Day Football semifinal-ah Mizoram Police tho an hneh lo. Semifinal khelh hma hian Chanmari chu chak tura rinkai an ni a, mahse MPL10 final-a an ngam loh Malsawmfela an ngam lo nawn a, nomawi an chan.

Knockout stage-in boruak hran a neih avangin Chanmari leh Police inkhel tur hi chu an inkhelh tawhna aṭanga teh a harsa a, chutihrualin kumin MPL semifinal hi double leg-a khelh tur a nih avangin squad leh chhah zawk leh team ṭha zawka ngaih Chanmari FC dinhmun a ṭha zawk.

I League 3 - Pahnihna

Chanmari hian tun season I League 3 an khel tel a, India ram pum huap inelnaa an record ṭha tak vang hian inrintawkna an nei ang. Lalsangzuala Hmar hote hian Pathianni khan final-ah Diamond Harbour hneh lo mah se I League 3-ah match riat an chak zawn a, an record hi a ropui tham hle.

Sanga hote hian group stage-ah match li khelin goal 12 an khung a, goal thum chiah an chhuah. Final round-ah pawh goal 10 khungin goal khat chiah an chhuah a, Kolkata-a an chet ṭhat avangin team chhung boruak pawh a ṭha dawn. Mahse, nimin khan Chanmari hian Aizawl an rawn thleng ve chauh a, chhum a zin nasat avangin Lengpuiah ṭum mai loin Guwahati-ah an ṭum leh phawt a, chumi hnuah Aizawlah an ṭum.

Chanmari hian semifinal atan inpuahchahna ṭha an nei lo a, I League 3-a pahnihna an nih avanga duhsakna an dawn chuan loh avangin hmabak a harsa dawn. I League 3 an khelh lai hian MPL an khel kawp reng a, coach Sanga'n engtin nge squad a thlan dawn tih pawh hriat a châkawm hle.

A hmuhnawm dawn

Chanmari team enkawltuten vawiin lamah player dinhmun an endik ang a, semifinal khel thei tur an thlang chauh dawn. Chutihrualin Kolkata-a che ṭha Vincent Lalduhawma erawh hliam vangin a la khel thei dawn lo a, coach Sanga'n player ṭhenkhat a hahdamtir a rinawm bawk.

Chutihrualin I League 2 an inpettlin theihna tura hmun pawimawh chang captain Lalrinchhana Tochhawng, Lalkhawpuimawia, KC Malsawmsanga leh Malsawmzuala te erawh khelhna hun an chan leh ngei a rinawm.

Chanmariin inpuahchahna hun ṭha an neih loh laiin Mizoram Police erawhin inpuahchahna hun ṭha an nei a, an ṭhat dan ber pawh an hrechiang tawh bawk. Hliam vangin goalkeeper tawnhriat nei ṭha F. Lalmuanawma inlan thei dawn tawh lo mah se Malsawmkima'n hna ṭha tak a thawk.

Semifinal a nih tawh avangin tlarhnung tih phui ṭha a pawimawh dawn a, Police tan Lalhmunmawia (Ahmuntea) leh FC Lalhmunmawia te an pawimawh leh dawn. I Day Football-a champion puitu midfielder Michael Lalbiaksanga'n pressure a ngam chhunzawm a pawimawh a, chumi tur chuan H. Lalbiakthanga leh R. Malsawmtluanga ten midfield an uap ṭhat a pawimawh ang.

Semifinal a nih tawh avangin MPL11-ah goal khat chauh la khung mah se Malsawmfela chu enbik tur a ni ang a, Ramhlun South striker hian hna ṭha tak a thawh theih nan kum lama naupang zawk F. Lallawmkima leh Isak Malsawmkima ten an thlawp ṭhat a ṭul dawn. Police tan first leg hi a pawimawh dawn a, zanina Chanmari an hneh theih chuan final kalkawng a inhawn zau phah thei ang.

Ngaihnawm

Chanmari FC hi MPL-ah vawi hnih an champion tawh a, MPL2 leh MPL5-ah an champion. An champion hmasak ber ṭumah H. Vanlalthlanga chu head coach a ni a, tun ṭuma team enkawltu Lalsangzuala Hmar hi assistant coach a ni thung. MPL5-ah erawh Sanga hoin an champion.

Sanga hian Chanmari FC bakah Chhinga Veng leh Chawnpui FC a champion pui tawh a, MPL-a club pathum champion thei hmasa ber leh awmchhun a ni.

Chanmari hi MPL ṭantirh aṭanga tun thlengin an la tel kim vek a, Aizawl FC nen MPL season tina khel vek thei an ni.

Mizoram Police hi inelna hmasa berah champion rinkai ni mah se pahnihna niin season an khar a, MPL10-ah Lalbiaksanga Colney hoin a vawi khat nan an champion ve chauh.

MPL4-ah khan Police hian point 12 chauh an hmu a, an relegate. Season khat chhung ADFA First Division khelin MPL6-ah an rawn kir lehnghal.