Villa Park-ah Man United-in point hlawh chhuak

Manchester United-in Pathianni zan khan Villa Park an tlawh a, Aston Villa nen goal awm loin an inhnehtawk. Erik Ten Hag-a hoten point khat chauh an hlawhchhuah avangin match sarih aṭangin point riat chiah an la hmu a, table-ah 14-naah an awm. Table aṭanga thlir chuan Man United hian champion aiin relegate an hnaih zawk.

Chutihrualin, Man United hian Bayern Munich chak lohna hmunah point an hlawh chhuak a, Tottenham Hotspur leh FC Porto lakah goal thum ve ve chhuah zawn mah se Unai Emery hote laka tlarhnung an tih phui avangin lawmna tur a awm. Inkhel hi club neitu zinga mi Sir Jim Ratcliffe-a'n a hmunah a thlir a, lawmna tur a hmu ve ang em tih erawh ngaihtuah tham a tling.

Goal a lut lo

Ten Hag-a'n tlarhnung rem phui tumin risk a la a, Spurs leh Porto laka inkawp Lisandro Martinez leh Matthijs de Ligt te chu bench-ah dahin kum lama upa zawk Harry Maguire leh Jonny Evans te bul a ṭantir. FA lamin Bruno Fernandes hremna an hnukkir zarah United captain hi bul ṭantu zingah a tel bawk.

Villa Park-ah Man United-in chance ṭha an nei hmasa zawk a, Marcus Rashford-a'n mual vei lam aṭanga ball a lakluh hnuah kawh zetin a pet a, keeper Emiliano Martínez-a'n a dansak. Mualneitu lam pawhin chance ṭha an nei zui a, Morgan Rogers-a'n hnai tak aṭangin goal zawnah a pet lo.

Goal lut turin an innawr na tawk lo. Second half-ah Rashford bawkin Martinez tan hna a siam a, Youri Tielemans-a'n Andre Onana tan hna a siam ve bawk. Man United captain Fernandes box pawn aṭangin crossbar a pet per a, a per let chu Antony-a'n goal zawnah a pet thei lo.

Man United an vanduai tihna a ni chuang lo a, Villa-in hun tawp hma hretin chak theihna hun ṭha an hlah ve tho. Kum 22 mi Jaden Philogene chuan hun ṭha bik nei mah se Diogo Dalot a pet per a, Man United an him hram.

Evans a khel ṭha

Man United defender Jonny Evans chu man of the match-a thlan a ni a, kum 36 mi Evans hian Ollie Watkins bakah second half-a lut Jhon Duran te a veng ṭha hle. Chutihrualin Evans che ṭha hian Man United dinhmun thui tak a hril thung.

Ten Hag-a'n tlarhnung thar din tumin Lisandro Martinez a la lut a, season liam ta nipui khan Harry Maguire chu chhuahtir a tum bawk. Argentine defender thlawp turin kuminah Leny Yoro an lalut a, Victor Lindelof an chelh a; Yoro inhliam hnuah De Ligt an lalut bawk.

Mahse, Villa nena inkhel pawimawh takah Evans leh Maguire te inkhel bul ṭan turin a thlang a, hei hian Ten Hag-a te tum danin thil a kal lo tih chu a chiang hle. Midfield-ah ni se, nipui bazar tawp lama an lakluh Manuel Ugarte chu bench-ah a ṭhu tluan. A tawi zawngin Man United-in khelh dan nghet an la nei lo.

Inkhelh banah Erik Ten Hag chuan, "Inkhel harsa tak pahnihah point kan hlawh chhuak ve ve a, hei hian beiseina leh rinna kan neihzia a pholang. Tun season-a vawi li goal kan chhuah lohna a ni a, kan inkhelah khan inrem dan mumal tak leh kan inlungrualna hmuh theihin a awm," tiin hma an sawn thu a sawi.

Man United hian match nga chhung chak hmel hmu tawh lo mah se Dutch manager hian club thuneitute lamin an la ringtawk a, ban an tum thu hriat a la ni lo. Ten Hag hian Old Trafford-ah thuneihna a chelh zui ang.