Chelsea an chak zo lo; Spurs an tlawm!

Team indinthar Chelsea fan-ten champion an sawi ri ṭan a, mahse, Liverpool, Manchester City leh Arsenal hming an lam ri ve ṭan chiah a, Nottingham Forest lakah an chak zo lo nghal - Pathianni zan khan 1-1 in an in draw.

Liverpool pawh hneh tawhtu Forest hian Chris Wood hmangin goal an khung hmasa zawk hial a, Blues tan Noni Madueke chuan si phurh a sut. Minute 78-naah Forest midfielder James Ward-Prowse hnawhchhuah ni zui mah se, Chelsea hian goal an khung belh lo.

Hetihlai hian Manchester United sawptu Tottenham Hotspur pawh an chak zo lo! Spurs hian khualmualah Brighton & Hove Albion chu 3-2 in an ngam lo a, league match sariha vawi thum an tlawmna a ni ta der.

1-1

Stamford Bridge-a inkhelah first half chhungin goal a lut lo a, goal khung hmasatu chu Forest an ni. Nuno Espirito Santo enkawl team tan minute 49-naah Wood chuan goal hmahruai a khung a, he goal luh theih nana Ward-Prowse-a freekick a ṭha a, assist tu Nikola Milenkovic-a'n a tih ṭhat tluk zetin Wood-a'n a ti ṭha bawk.

Chelsea ṭantute an hawihai a, an hlauthawng hman. Mahse, goal an chhuah aṭanga minute riat hnu lawkah Madueke chuan Cole Palmer-a siamsak chu duhthala a insiamrem hnuah si phurh sut nan a khung a, 1-1 a ni.

Blues-in chak duhin Christopher Nkunku, Joao Felix, Mykhailo Mudryk leh Pedro Neto te bench aṭangin an luhtir thei a, goal erawh an hlawh chhuak chuang lo - Palmer-a khung ngei tur nia lang chu Matz Sels-a'n vawi hnih ngawt a dansak a, Felix leh Nkunku ten an chance neih an hlah bawk.

Cho leh cho

Chelsea khelmualah sawi zui tlak thil thleng a tam - Ward-Prowse chuan Nicolas Jackson hmanga Blues counter-attack tur chu a kut hmanga a lo dan avangin yellow card pahnihna a hmu a, hnawhchhuah a ni.

Inkhel tawp hnaih lamah Neco Williams chuan Blues defender Marc Cucurella a nam a, buaina tenau a chhuak - team pahnih hrem an nih ngei a rinawm a, he thu buatsaih a nih lai hian thuchhuah a la awm lo. Blues player-ten yellow card vawi ruk an hmu a, Premier League dan angin £25,000 an chawi ang!

Cucurella leh Wesley Fofana ten tun season-a an yellow card pangana an hmuh ve ve avangin an match khelh leh turah Liverpool an hmachhawn thei dawn lo a, Madueke-a'n hliam tenau a nei bawk.

Spurs an tlawm

Brighton khelmualah Spurs tan Brennan Johnson-a'n match ruka a goal rukna khungin, a team hma a hruaipui a, James Maddison-a'n a belhchhah zui - London club hian harsatna nei loin hnehna an chang dawn emaw an ti hman.

Mahse, an beisei ang erawhin thil a kal lo. Chawlhlawk hman zawh a nih hnuah Brighton an khel ṭha sawt a, Yankuba Minteh leh Georginio Rutter ten second half ṭan aṭanga minute 13 chhungin si phurh an sut zo a, Danny Welbeck chuan chakna goal a khung zui.

Old Trafford-a hnehna hlado an chham hnu lawkah Spurs an tlawm a, manager Ange Postecoglou a lawm lo. 'Big Ange' hming lem an pek coach chuan, "Result lawmawm lo tak a ni a, ka lungawi lo hle. Second half kan khel chhia a, kan nih tur ang kan ni lo - kan thla a muang hma mah mah a ni mahna," a ti a, an tihdik loh siamṭhat chu a hna a nih thu a sawi bawk.