India squad-ah a vawi khat nan Terina
Vietnam nena international friendly match khel tur India coach Manolo Marquez chuan Pathianni tlai khan Blue Tigers final squad a puang chiang a, Chennaiyin FC midfielder Lalrinliana Hnamte (Terina) chu a vawi khat nan India squad-ah telh a ni.
Terina bakah hian Mumbai City captain Lallianzuala Chhangte, Mohun Bagan midfielder Lalengmawia Ralte (Apuia) leh I league club aṭanga koh awmchhun, Inter Kashi forward Edmund Lalrindika te chu squad-ah hian an tel bawk a, India squad-ah Mizo pali an awm.
Chanmari/Dungtlang tlangval Terina chuan, "India senior team-a koh hi chu ka la beisei lo lutuk a, a nuam dawn khawp mai. Pathian khawngaihna vang liau liaua tun dinhmun hi thleng ka ni tih ka inhria a, Chennaiyin ka pan hi ka tifuh viauin ka inhre bawk," tiin Vanglaini a hrilh.
East Bengal leh Mohun Bagan midfielder hlui Terina hian season ṭan dawn khan Bagan chhuahsanin, Chennaiyin FC a pan a, Bolton Wanderers boss hlui Owen Coyle kaihhruaina hnuaia league match thum an khelh tawhah bul a ṭan vek.
Blue Tigers boss Manolo hian a tirah player 26 a ko a, player pathum a chhawk leh - player pathum a paihte hi Mohun Bagan midfielder Anirudh Thapa, East Bengal winger Nandhakumar Sekar leh Chennaiyin forward Rahim Ali te an ni.
Terina hian Indian midfielder ṭha pawl Anirudh Thapa hi a nek chhuak tiin a sawi theih a, Manolo chuan, "Vietnam hneh thei tura ka ngaih player ka ko," a ti a, hmning langsar aṭanga player a teh loh thu a sawi.
Chanmari FC aṭanga inzir chhuak Terina bakah hian Aakash Sangwan chu India senior team-a a vawi khat nana koh a ni a, ani hi Manolo club enkawl FC Goa left back a ni.
Indian football team hi a tirah chuan inelna thlengtu Vietnam bakah Lebanon te nen tri-nation series khel tur an ni a, mahse, Lebanon hi an ram buaina avangin an zin chhuak thei lo a, an inhnukdawk.
Blue Tigers hian tun international break-ah match khat chiah an khelh dawn phah a, Asian football-a team ṭhangduang tak Vietnam nen October 12, Inrinni tlai dar 4:30-ah an inkhel ang. India hian nimin zing dar 5:00 khan Vietnam an thleng.
India Squad
Goalkeepers: Gurpreet Singh Sandhu (Bengaluru), Amrinder Singh (Odisha FC), Vishal Kaith (Mohun Bagan)
Defenders: Nikhil Poojary (Bengaluru), Rahul Bheke (Bengaluru), Chinglensana Singh Konsham (Bengaluru), Anwar Ali (East Bengal), Aakash Sangwan (FC Goa), Subhasish Bose (Mohun Bagan), Asish Rai (Mohun Bagan), Mehtab Singh (Mumbai City), Roshan Singh Naorem (Bengaluru)
Midfielders: Suresh Singh Wangjam (Bengaluru), Lalrinliana Hnamte (Chennaiyin FC), Jeakson Singh Thounaojam (East Bengal), Brandon Fernandes (Mumbai City), Liston Colaco (Mohun Bagan), Lalengmawia Ralte (Mohun Bagan), Lallianzuala Chhangte (Mumbai City)
Forwards: Edmund Lalrindika (Inter Kashi), Farukh Chaudhary (Chennaiyin FC), Manvir Singh (Mohun Bagan), Vikram Partap Singh (Mumbai City)