LPS Pro Fight inbuk hun a chiang

Tualchhung boxing inelna ngaihhlut - Zudio LPS Pro Fight ṭan hun sawn hlat a ni a, inhnek ṭan hun tur chu November 1 a ni dawn, inelna hmachhawn tur inbuk hun atan October 28 ruat fel a ni bawk.

Ocotober 28, Thawhṭanni zing dar 8:00 aṭanga chhun dar 12 thleng LPS Arena, Falkland-ah boxer an inbuk dawn a, an hriselna endik hmasak a ni ang.

Pro Fight vawi 11-naah hian weight hrang panga - fly, bantam, light, welter leh middle-ah champion nih an inchuh dawn a. October 19 thleng tel tum tan LPS Office, Zarkawtah entry form theh luh theih a ni.

Hriat theih chinah boxer 200 chuangin entry form an la chhuak tawh a, 100 chuangin theh lut tawh bawkin heng zingah hian Meghalaya aṭangin boxer pahnih an tel tawh a ni.

Ruahman dan chuan December kar hmasa berah Title Fight neih tur a ni a, title humhim turin bantam champion Laldinsanga, welter champion Lalruatzela Hauzel leh middle champion C. Lalhruaitluanga an inlan dawn tih an sawi chiang tawh.

Hetih lai hian fly champion NT Lalbiakkima dinhmun a chiang lo a, rilru lama harsatna a neih avangin title humhim turin a inlan theih a beisei sang lo thung a ni.

HC Lalramfela'n light title a kawl mek kalsanin welter-ah a insawn dawn thung a; kum 2015 bantam champion hian Pro Fight chanchina weight hrang pathuma champion hmasa ber nih tumin chona a hmachhawn dawn a, tun hi Pro Fight bika a inhnek hnuhnun ber tur a ni bawk.

Nikum khan weight hrang pangaah boxer 281 an tel a, Organising Committee chuan kuminah boxer tam zawk an tel ngei an ring a; mimal chawimawina tel loin lawmman pawisa fai Rs 6,50,000 semchhuah a ni ang.