China Open champion Gauff

Tennis inelna China Open khelh zawh takah Coco Gauff a champion - nimina final inkhelah American star hian a khingpui Karolina Muchova chu 6-1, 6-3 in a hneh.

World number 6 Gauff hian inelna tir lamah harsa takin hnehna a chang hram hram ṭhin, a match hmasa pathumah phei chuan set a hloh hnuah a tho chhuak leh hram chauh a ni, mahse final bikah erawh a chak nuamsa hle.

Kumtir lamah khan Auckland-ah final a lut a, tunah a chhunzawm leh chiah. Czech Republic nula hneh tur hian darkar khat leh minute 17 chiah hun a hmang a, set hnih an khelh chhungin harsatna lian tham a tawk lo.

Kum 20 mi Gauff chuan, "Hun rei tak chhung chu vanneihna chan tumin ka vak kual tawh a, tunah chuan Diamond Court-ah ngei mai chu vanneihna chu ka chhar chhuak leh ta, kum tharah pawh ka tlawh nawn leh ngei ka ring.

"Karolina pawh ka lawmpui, hun rei tak chhung banrek na vanga inkhel thei lo kha a ni a, tunah chuan ṭha takin a khel thei leh ta, final dang thleng leh zel turin pawhin ka duhsakna ka hlan," tiin a sawi.

US Open champion hlui Gauff hian result ṭha neih tumin a beisei nasa hle a, thla hmasa khan a coach Brad Gilbert nen an thawhdunna titawpin coach thar Matt Daly a ruai a, tunah chuan hlawhtlinna a chang ta a ni.

Europe leh United States lamah tennis inelna a zo rih a, tunah chuan Asia khawmualpuiah tournament hrang hrang an khel mek - tun kar aṭanga khelh tur Wuham Open-ah Gauff pawh a inlan chhunzawm ve leh ang.

Season tawp hmain a thiam zual, ranking pakhatna aṭanga pariatna ten WTA Finals an la khel ve leh bawk dawn a ni.