Marmoush-a'n Bayern a ngawihtir

Bayern Munich-in Pathianni zan khan Eintracht Frankfurt an tlawh a, 3-3 in an inhnehtawk. Minute 90-naah pawh Bayern hi 3-2 in hma la hruai mah se, injury time minute linaah Omar Marmoush-a'n mualneitu tan si phurh a sut a, Vincent Kompany hote point khatah an lungawi a ṭul.

Bavarians hian Bundesliga-a an elpui Bayer Leverkusen nen Allianz Arena-a 1-1 a an inhnehtawk hnuah Aston Villa an hneh lo a, Champions League-a an mualpho hnuah Frankfurt-in an chelh. Kompany hoten match thum chhung chak hmel an hmu tawh lo a, Bundesliga-ah erawh point 14 hmuin pakhat dinhmun an la hauh thung.

Khualmualah Bayern-in bul an ṭan ṭha a, minute 15-naah corner kick aṭanga ball kal chu Thomas Muller-a'n box chhungah la thlain Kim Min-jae a tan ball duhthusam a pe a, Korean defender hian hnai set sawt aṭangin kawh zetin a pet goal.

Goal an khung hnuah Bayern an inthlahdah zeuh a, an tlarhnung a pherh. Ansgar Knauff-a'n through ball ṭha zet a pe a, Marmoush-a'n um lutin cool zetin goal kilah a pet lut. Kum 25 mi Eyptian forward Marmoush a che ṭha chhunzawm a, minute 35-naah vei lam aṭanga ṭha taka a lakluh hnuah Hugo Ekitike tan a pe a, French forward hian mualneitu tan hmahruaina goal a khung.

Mahse, Frankfurt-in corner kick an veng ṭha tawk lo. Michael Olise-a pet chu dang thei mah se a per chu Dayot Upamecano-a'n a khung a, minute 35-naah si phurh sut zoin halftime-ah 2-2 a ni. Second half-ah Bayern-in bul an ṭan ṭha a, Olise-a'n box chhungah rilru fim pumin minute 54-naah mawi zetin a pet goal.

Bayern an chungnung zawk a, ball an chan tam bakah inkhel an thunun. Mahse, injury time-ah Edimbe-a'n Bayern tlarhnung ruak laiah tak a tauh lut a, Bavarians defender-ten Marmoush an umpha lo. Egyptian forward hian box chhungah chiah, goal-ah kawh zetin a pet lut a, Frankfurt-in si phurh an sut zo a, 3-3 in inkhel a tawp.