LewanGOALski a vul leh ta...

Kum 36 mi a nih ve tawh avanga uai thla ve ṭan tawha ngaitute zawng zawng ka chu Robert Lewandowski-a'n a hup sak leh ta - Polish striker hi kum number-in a tibuai lo a, European top flight league-ah pawh striker tha za tak a la ni reng.

Lewy hian Pathianni zan khan Barcelona tan hattrick a siam a, Deportivo Alavés lakah Catalan club chu hnehna a chanpui. Barca hian La Liga match-ah hian 3-0 in hnehna an chang a, table chung ber an luah chhunzawm.

Barcelona-in hnehna an chan avangin, anmahni hnaih bertu Real Madrid chu point thumin an tlansan leh ta. Catalan club hian an league match hnuhnung berah Osasuna chu rin loh takin an ngam lo a, league match sarih zet a zawna an chak hnuah 4-2 in an tlawm.

Mahse, Osasuna laka an tlawm hnuah Barca an insiamṭha vat a, Champions League-ah Young Boys chu 5-0 ngawta sawpin, La Liga-ah 3-0 in an chak zui. Match hnihah goal riat khungin, an lamah goal a lut lo.

Goal khung thiam

Fur leh ruah tuite kawp tura duan an ni ang chiahin Lewandowski leh goal chu kawp tura duan an ni a, an kal hrang thei lo - minute sarihna lekah Polish striker hian goal hmahruai a khung nghal a, a siamsaktu Raphinha chu fak phu a ni.

Bayern Munich striker hlui hi rei a rial lo. Minute 22-naah an goal hnihna a khung lehnghal a, hei pawh Raphinha siamsak tho a ni. Lewy a phur laklawh - minute 32-na a thlen meuh chuan hattrick a siam fel der a, Barca an chak dawn tih a chiang tawh.

Alaves hian Toni Martinez hmangin an si phurh an sut veah an inngai a, mahse, offside vangin pawmsak an ni lo. Lewy goal thum hmangin Barca an chak a, Polish striker hian tun season inelna hrang hrangah match 11 khelin goal 12 a khung ta!

Lewandowski chuan, "Tih ṭhat chu ka nei ve ngei a, mahse, ka ṭhiante khan ka tana khung awlsam turin hna min thawhsak a ni. A tir aṭangin kan khel ṭha nghal a, goal khung châkin kan tuihal a ni," a ti a, an ṭhat tawk lohna lai an siamṭhat thu a sawi bawk.

Tlarhma an ṭha

Barcelona-in season duhawm tak an hmang mek a, a bik takin an tlarhmate an langsar - league bikah goal 28 ngawt an khung tawh a, La Liga-a anmahni hnaih bertu Real Madrid-in goal 19 bak an khung lo.

Lewandowski chu tlarhmaa an hnathawktu ber a ni a, La Liga bikah goal 10 leh assist vawi hnih a nei tawh. Tun season kal mekah European top five league-ah Lewy aia goal thawk chhuak hnem an awm lo.

Hetihlai hian Raphinha pawhin season duhawm bik hmangin, La Liga-ah goal nga a khung bakah assist vawi hnih a nei a, rawlthar duhawm Lamine Yamal pawhin goal li a khung tawh a, assist vawi nga a nei bawk.

Barca tlarhmaten league-ah belhkhawmin goal 19 ngawt an khung tawh tihna a ni a, assist vawi kua an nei bawk. Barca tan nomawi chawi tumna kawngah anni pathum chet ṭhat zel hi a pawimawh dawn.

Atletico chak zo lo

Real Madrid leh Barcelona te kartawp inkhelah an chak a, hetihlai hian Atlético Madrid erawh an chak zo lo - khualmualah Real Sociedad chu 1-1 in an inhnehtawkpui a, point sarih ngawtin hmahruaitu Barca an thlau ta.

Atletico hia minute khatna lekah striker Julián Álvarez hmangin goal hmahruai an khung a, 'An chak ang em?' tih aiin, 'Goal engzat tak khung ang maw ?' tih chu zawhna awlsam zawk a ni.

Mahse, Diego Simeone naute hian goal an khung belh tawh lo a, an chhuah zawk. Minute 84-naah Luka Sucic chuan goal mawi bik a khung - Atletico keeper Jan Oblak tan tih theih a awm lo a, 1-1 in an ṭin.

Atletico boss Diego Simeone chuan, "Ball kan hloh a, mahse, goal an khungna kha metre 40 deuhthaw alawm a nih! Kawng engkimah hmasawn zel chu a ngai a, mahse, ball hloh chang chu a awm lo thei lo - goal ropui tak a khung avangin Sucic kha lawmpui mai tur kan ni," a ti a, a naute a chhan pahin Sucic a fak.