Fiorentina chakna David de Gea

David de Gea chuan goalkeeper ṭha bik a nihna a lantir leh ta - Pathianni zan Serie A inkhelah Spanish keeper hian penalty vawi hnih ngawt dangin Fiorentina chu AC Milan lakah 2-1 in hnehna a chanpui.

Minute 22-naah Fiorentina lamin penalty an hmu hmasa, mahse Moise Kean-a pet chu Milan goalkeeper Mike Maignan chuan a lo dansak phawt a, penalty hlah mah se a hnuah Yacine Adli-a goal hmangin hma an hruai tho.

Chawlhlawk hma chiahin Milan tan Theo Hernandez chuan penalty a pet ve thung - Manchester United keeper hlui De Gea chuan a lo dang phawt, a hnuah Tammy Abraham-a penalty pet pawh De Gea bawkin a dang.

Penalty vawi hnih an hlah hnuah Milan hian goal an nei a, forward Christian Pulisic chuan si phurh a sut. Mahse, minute 73-naah Albert Gudmundsson chuan Fiorentina chakna goal a khung a, point thum hlu tak an hlawh chhuak.

AC Milan manager Paulo Fonseca chuan, "A tir lamah holam angreng takin penalty kan chawi a, thil thleng khan player-te a ti hlauthawng vek, an nih dan tur ang takin an khelh chhuah theih loh phah niin ka hria.

"Kan result avangin mi tam tak an lawm lo tih ka hria. Italy ramah chuan vawi khat chak loh hlek hian team chhe tak anga chhuah kan ni mai ṭhin, tunah chak lo mah ila kan chhe ta duai tihna erawh a ni bik lo," tiin a sawi.

Inkhel dangah Juventus chu Cagliari nen 1-1 in an inhnehtawk. Old Lady hian tun season Serie A match vawi sarih an khelh tawhah a vawi khat nan goal an chhuah ve chiah, hun tawp dawnah Razvan Marin chuan penalty aṭangin a khung a, a tir lama Dusan Vlahovic-a khung chu a sut a ni.

Juve manager Thiago Motta chuan, "Goal kan neih hnu khan inkhel thunun zui tur kan ni a, mahse chumi chu kan ti hleithei tlat lo, a tawpah kan tuar," a ti. A player ṭha ṭhenkhat Nicolas Gonzalez, Arkadiusz Milik, Timothy Weah leh Gleison Bremer te inlan thei lo an tuar tih a sawi bawk.