LeBron James leh a fapain record an siam!

Basketball legend LeBron James leh a fapa Bronny James te chuan nimin zing khan Los Angeles Lakers tan an inlan dun a, NBA huangah team pakhat tana pa leh a fapa inlan dun thei hmasa ber an ni.

Bronny hian kum 20 a tlin chamah Lakers tan match a khel, NBA season thar inbuatsaihnaah Phoenix Suns an hmachhawn ṭum hian minute 13 chhung a inlan - point leh assist erawh a nei lo, a pa James erawhin minute 16 chhungin point 19 leh assist vawi li a nei hman.

Tun hmain NBA match pangngai emaw, match dang pawh ni se NBA hnuaiah hrim hrim pa leh fapa hi team pakhat tan an la khel rual ngai lo, tunah chuan kum 39 mi James leh Bronny ten midang tih theih ngai loh hi an rawn ti ta a ni.

Los Angeles Lakers thiampuipa James chuan, "Thil thleng thei lo tura ngaih kha a ni a, mahse a takin a lo thleng ta. Khelmual chhungah kan lut dun a, pawna kan chhuah leh te khan mak ti takin ka en," tiin a sawi.

LeBron James hian NBA season 22-na a hmang dawn a ni a, a kum tamin a vanglai pel ve deuh tawh mah se khawvela a ṭha berte zinga mi a la ni phak a, season tharah pawh basketball inelna lian ti hmunawmtu a ni leh ngei ang.

NBA 2024-25 season hi October 22, Thawhlehni aṭangin khelh ṭan a ni dawn - Lakers hian an match hmasa atan Minnesota Timberwolves an hmachhawn dawn a ni.