Enrique enkawl PSG chelhtu Nice

Ligue 1 champion lai Paris Saint Germain chuan Nice lakah an siphurh an sut a, mahse chakna goal erawh an khung thei ta bik lo - an mikhualna ramah Luis Enrique naute hi 1-1 in an inhnehtawk.

Pathianni zan Allianz Riviera-a inkhelah mualneitu Nice tan Ali Al-Abdi chuan chawlhlawk hmain goal a khung a, second half-ah Paris club tan Nuno Mendes chuan a sut a, goal dang a lut zui tawh lo.

Point an hloh leh tak avangin Paris Saint Germain hian Ligue 1 hmahruaitu an nihna pawh an hloh nghal, league match vawi sarih aṭanga point 17 hmuin pahnihnaah an awm, an chungah AS Monaco (19 points) an awm a ni.

PSG manager Enrique chuan, "Season tir lam chauh a la ni a, duhthusam lo lai chu la awm mah se ka naute khelh danah nikum aiin lawmna tur tam tak a awm, siamrem ngai lai kan la nei tih erawh kan pawm thlap.

"First half-ah khan khel ṭha tak chung siin goal hmaah kan hriam tlat lo, chu chu a hnuah a pawizia kan hmu. Second half chu kan ziaawm hret a, chutihrualin kan duh ang thlap erawh a la ni lo thung," tiin a sawi.