Martin hnaihchilhtu Bagnaia

MotoGP champion lai Francesco Bagnaia chuan a nomawi humhim ngei a tum a, season kal laia rider championship hmahruaitu Jorge Martin a hnaih chilh ta hle - an inkarah point 10 chauh a awm ta.

Pathiannia tlan zawh tak Japanese Grand Prix-ah Bagnaia a che ṭha hle, Italian rider hian intlansiak pangngai bakah sprint race-ah te hnehna a chang a, a hnungah hian Martin a thleng thung a ni.

Kum 27 mi Bagnaia hian hnehna chang turin a hmasa ber aṭanga tlan chhuak Pedro Acosta chu lap khatnaah a lehpel a, intlansiak chhung zawngin hma a hruai zui thei, a tawpah pahnihna Martin aiin second 1.189 in a thleng hma zawk.

Ducati rider Bagnaia chuan, "Intlansiak lehpekah pawh tun ṭuma kan chet dang ang hian tih leh kan tum tur a ni ang, inbuatsaihna a ṭhain kan rilru put hmang pawh a dik vek, sawisel tur kan nei lo," tiin an team chet danah a lungawi hle.

Bagnaia leh Martin hnungah hian, world champion lo ni fo tawh Marc Marquez a thleng - Spanish rider tan champion beiseina sang tawh chiah lo mah se, tun season chawhnu lama inela boruak siam nungtu a ni chiang hle a ni.

Bike intlansiakna sang ber hi October 20, Pathianni hian a tlan chhunzawm leh ang. Tlan kawng mawi tia an sawi ṭhin Phillip Island Circuit-ah Australian Grand Prix an tlan leh dawn a ni.