Liverpool rawltharin Wales chakpui

Thawhṭanni zan khan Wales-in Bulgaria 1-0 in an hneh a, goal awmchhun hi injury time-ah Liverpool rawlthar Neco Williams-a'n a khung. Ryan Giggs-a hote hi match hmasa pahnihah hnehna an chan ve ve avangin Nations League khelh mekah an group awmnaah hmahruaitu an ni.

League B group 4 inkhel dangah Finland-in kum 22 mi Fredrik Jensen-a goal hmangin Republic of Ireland 1-0 in an hneh ve bawk.

Wales tlarhma an hriam tawk lo a, chutihrualin a tlarhnung erawh ṭum dang ang thoin a phui ṭha hle. Captain Gareth Bale-a'n bul ṭanin a khel tluan a, danglamna siamtu erawh minute 76-naa David Brooks thlaktu Neco Williams a ni.

Kum 19 mi Neco Williams hian injury time minute linaah Jonathan Williams a cross chu ṭha zetin a tauh lut a, Bulgaria tan chhanletna hun a awm tawh lo.

Welsh right back Neco Williams hian nikum October 30 khan League Cup-ah Liverpool tan a inlan a, FIFA Club World Cup champion team-ah tel mah se a inlan lo. Kumin June 24 khan Reds tan Premier League-ah a inlan ṭan a, Trent Alexander-Arnold thachhang dawltu ni mah se season tawp meuh chuan Premier League match rukah a inlan hman. Ryan Giggs-a'n Neco Williams ṭhatna a hmuh hmaih lo a, Wales-ah pawh player pawimawh a ni chho thei ang.