Federer tan hna a awlsam

Roger Federer chuan vawi ruk a champion tawhna Australian Open-ah nimin khan Steve Johnson a hmachhawn a, seeded pathumna hian harsa lo tak 6-3, 6-2, 6-2 a hnehna changin second round a lut.

Rod Laver Arena-a inkhelah Federer hi kawng engkimah a chungnung, season hmasa kharna ATP Finals hnua a match hmasa leh berah hian hnehna chang turin darkar khat leh minute 21 bak a mamawh lo a ni. Kum 38 mi Federer chuan, "Hun rei tak hnuah tournament ka khel leh chauh a ni a, 100% a ṭha chuan ka la khel chhuak lo deuh. Ka sawi tawh ṭhin ang bawkin  round hmasa lam hi chu a harsa ṭhin, tun ṭumah pawh hian finkhur a ngai," a ti.

 

Nimin inkhel dangah Denis Shapovalov a chak lo. Seeded 13-na hi player langsar lo Marton Fucsovics lakah rin loh tak maiin 6-3, 6-7 (7-9), 6-1, 7-6 (7-3) in a chak lo - a khelh chhiat vangin Shapovalov hi a thinrim a insum zo lo.

Canadian tlangval hian a racquet a paih tau a, umpire chuan a zilhhau. Kum 20 mi Shapovalov hian a thil tih danah dan bawhchhiatna a neih a hriat loh thu a sawi thung. Nimin tlai khan rawlthar beiseiawm Stefanos Tsitsipas a inlan bawk, Greek tlangval seeded parukna hian a khingpui Salvatore Caruso chu 6-0, 6-2, 6-3 in a hneh. Inelna neih ṭan hmaa a sawi ang ngeiin set hloh loin hnehna a chang thei a ni.