Bucks an la tlawm lo

NBA Eastern Conference semifinal-ah chak tura rinkai Milwaukee Bucks an talbuai a, game hmasa pathum an hloh hnuah Miami Heat chu an hneh let ve hram a, series-ah 3-1 niin Nilaini zing dar 4:00-ah game 5 an khel ang.

Nimin zing inkhelah khan Bucks hi chak lo ni se chuan Heat lam hi 4-0 in an tlang dawn, mahse overtime khelh a ngaih hial hnuah Bucks lamin 118-115 a hnehna chang ve hlauhin an beiseina an chhem nung ve leh, tlang tur erawh chuan khelh hmabak hoah an chak vek a ngai tawh.

Bucks an phur thar a, chutihrualin an thiampuipa Giannis Antetokounmpo chu kerek hliam vanga lak chhuah a ngai. NBA Most Valuable Player hian minute 11 chauh khel hman mah se point 19 ngawt a nei hman.

Game 5 an khelh hunah Antetokounmpo hi a inlan thei dawn em tih a la chiang lo, a inlan thei lo a nih chuan Khris Middleton chungah mawhphurhna a sang zual ang. Middleton hian game 4 bikah point 36 a neih bakah rebound leh assist vawi riat ve ve a nei bawk - tha thawhhlawk ber a ni.

Middleton chuan, "Player tin khan theihtawp kan chhuah tlang vek, Giannis a hliam hnuah phei kha chuan ama tan khan ṭhahnem kan ngai zual vek emaw tih mai tur a ni," a ti. Bucks player zinga paruk chuan point 10 chuang an nei a, ṭanrual rah an seng.

Nimin zing vek khan Western Conference semifnal game 2 khelh chhunzawm a ni ve bawk. Regular season lama hmahruaitu Los Angeles Lakers chuan Houston Rockets 117-109 in an hneh let a, best of seven series-ah 1-1 a ni.

Lakers tan Anthony Davis leh LeBron James an hmuhnawm, an in manin an thawhhlawk takzet - an pahniha point an hmuh belhkhawm chu point 62 zet a ni a, rebounbs an lak pawh 21 niin Rockets lamin an ngam meuh lo.

Lakers leh Rockets hian Nilaini zing dar 6:30-ah game 3 an khelh leh dawn, season kal laia team hmuhnawm leh ṭha bik an nih avangin inkhel hmuhnawm an chhawp chhuak leh ang.