Police nge nge; Chanmari chak lo; Minute 102!
LZ Juice MPL11-ah football hmuhnawmna phochhuahin a awm a, champion lai Mizoram Police-in I League 2 inpetkai hlim Chanmari FC 2-1 in an hneh. Lalbiaksanga Colney hote semifinal thawh khatnaah chungnung hret mah se minute 90 khelh tur a la awm - final lut tur a la chiang lo.
RG Stadium-a inkhelah Mizoram Police-in Lalfakzuala leh R. Malsawmtluanga te goal hmangin 2-0 in hma an hruai a, Chanmari-in injury time-ah MS Dawngliana goal hmanga sut ṭhenin final kawng harsa lutuk tur an tiziaawm ang.
Sa huai an ser
Chanmari FC-in I League 3 final-ah Lalkhawpuimawia bul ṭantir lo mah se MPL11 semifinal first leg-ah bul an ṭantir a, chutihrualin goalkeeper Zothanmawia erawh a ṭhal na vangin a inlan thei lo a, RS Lallawmzuala bul a ṭan thung.
I League 3 an khelh zawh tawh avangin Lalsangzuala Hmar-in duh ang tawkin player a thlang thei tawh a, chutihrualin October 7, Thawhṭannia Aizawl an thlen chauh avangin hahdamna hun ṭha an nei lo thung.
Mizoram Police erawhin inbuatsaihna hun ṭha an nei a, Malsawmfela erawh a khup hliam vangin bul ṭan thei dinhmunah a ding lo. Sawmfela aiah F. Lalrinpuia'n bul a ṭan thung. MPL-a forward record nei ṭha Valpuia hian hliam vangin MPL10 tawp a khel lo a, tun season-ah inziaklut mah se ngai a awh tawh bik loh avangin a inlan meuh lo.
Goalkeeper F. Lalmuanawma leh right back Lalrinzuala ten an khup an tih nat avangin tun season-ah a inlan tawh dawn lo a; goalkeeper R. Malsawmkima bakah MPL-a tawnhriat nei tlem Lalrinchhana te chungah rinna an ngah a ṭul.
Chutihrualin coach Lalbiaksanga Colney-in semifinal chinah chuan tawnhriat nei ṭha midfielder MS-a pawh bul a ṭantir leh tawh a; bul ṭantu zingah Police ti Police-tu tia sawi theih Lahmunmawia (Ahmuntea), H. Lalbiakthanga, Fakzuala, MS-a, leh Valpuia ten bul an ṭan. Civil player theihna nei sang FC Lalhmunmawia, F. Lallawmkima leh Michael Lalbiaksanga te bul ṭantu zingah an tel bawk.
Tum fel nei
Mizoram Police-in tum nghet tak an nei a, Chanmari laka goal chhuah loh an tum a, counter attack hmanga vuak let an tum bawk. Chanmari lamin inkhel an thunun nghal a, Police an tumah an chiang a, an talbuai lo.
Police-in nawrna remchang an nei a, Valpuia'n a tawnhriat ngahna hmang ṭangkaiin pass chhuah tur a neih tawh loh hnuah thiam takin freekick an hlawh chhuak. Minute kuanaah Fakzuala a rawn pen chhuak a, Police captain hian goal kilah tak crossbar perin a pet lut a, Chanmari keeper RS Lalawmzuala tan dan ngaihna a awm lo.
Goal an chhuah hnuah Chanmari an talbuai a, hun rei lote chhunga insiamremin a nawrtu zawkah an ṭang lehnghal. Mahse, Ahmuntea leh FC-a te inkawp ṭha a, Police player dangte an thawhrim bawk avangin Chanmariin goal khungna tur chance ṭha bik an nei lo.
Police erawhin goal hniha hmahruai theihna hun ṭha an nei a, Valpuia ball pass ṭha chu vengtu nei lo Michael-a'n box chhungah chang fuh mah se I Day Football best player hian a pet over.
Police nge nge
Hlaftime-ah Chanmari an infuih ṭha a, second half-ah an khel ṭha sawt. Police-in goal venhim tuma an bet lehzual avangin duh thalin Chanmariin an nawr thei a, Police tlarhnung a phui reng thei lo.
Moses Lalrinzuala'n goalkeeper chauh hmachhawn hnuah goal-ah pet mah se Police keeper Mana'n a dansak. Malsawmzuala'n goal ban a pet per a, Chanmariin MS Dawngliana leh JH Remlala te an luhtir hnuah an nawr lehzual.
Mahse, Police forward Valpuia'n freekick a hlawh chhuak a, minute 63-naah Fakzuala bawkin petin MS-a'n a tauh lut. Ball pet thiam vanga lar MS-a pawhin a lu a hmang thiam a, Chanmari captain Rinchhana'n a veng hneh lo.
Police-in goal hnih an khung tak avangin a hma ai mahin tlarhnung an tiphui ṭha a, an striker Valpuia chu defence hmasa ber tiin a sawi theih. Chanmariin an nawr nat zel avangin Police lamin counter attack hmanga vuak let nan Malsawmfela an luhtir a, Sawmfela hian ṭum hnih ngawt Chanmari tlarhnung rum ṭhaihin goal a khung teuh hle.
Minute 102!
Injury time minute li pek belh a ni a, minute thumna chhoah Chanmariin corner hmuin captain Rinchhana'n Police defender Ahmuntea lu a tauh fuh a, Hualngohmun pa hi nikhaw hre loin a tlu.
TV timing aṭanga a lan danin Ahmuntea tluk hi 93' 49' a ni a, minute ruk vel buaipui a nih hnuah minute 99'52"-naah inkhel ṭan leh a ni a, Police lamin hun tawp mai turah an ngai.
Mahse, referee-in titawp ta mai lo. Minute 101'40'-naah substitute Ephraim Lalremtluanga cross luh chu Dawngtea'n a tauh lut a, Chanmariin siphurh a sut ṭhen. Hun a tawp zui nghal a, Police 2-1 in an chak.
Lalbiaksanga Colney hote hian hnehna chang mah se goal luh hun vangin an thinur takzet. Inkhelh banah Police coach chuan, "Referee kan sawisel lawk teh ang. Ahmuntea a inhliama a rawn pheia fourth referee bulah hun a tawp tawha ngatinge i ham tawp loh ka tia. Tawp tawh e, corner an hmua advantage ka pe lo thei lo a ni, a tia. Chumi hnuah kan keeper-in goal kick a pet chhuak a, a ham tawp mai dawn a maw tihlaiin a 'play on' chhung pawh minute hnih a ral. An score chiaha a ham tawp lehlawi bawk sia. Hun a tawpa ambulance meuh a tlan lut tawha ngatinge a ham tawp loh tihlai hi a ni ka lungawi theih loh chu," tiin a lungawi loh thu a sawi.
A hmuhnawm dawn
MPL11 semifinal hnuhnung zawkah chak tura rinkai lo zawk Mizoram Police 2-1 in an chak a, chutihrualin minute 90 chhung khelh tur a la awm avangin final lut tur hriatthiam a la har hle.
Police hian MPL10 final leh kumin I Day Football semifinal-ah Chanmari hi an hneh tawh a, Chanmarians laka an record ṭha tak avangin inrintawkna an nei ang. Chutihrualin Chanmari hi I League 2 khel turin an inpettling a, injury time-a goal pawimawh tak an khung avangin chak tura rinkai zawk an la ni tho.