'Kalphung Thar Incentive Cash Award Scheme' kan kalpui dawn - Sports Minister

Sports and Youth Services Deparment chuan nimin khan April 1, 2023 - March 31, 2024 chhunga infiammi tiṭhate incentive cash award an hlan a, award hi national leh international level-a infiammi medal la pha chinte hnenah an hlan. Sports minister Lalnghinglova Hmar chu khuallian a ni.

Tun ṭumah hian Incentive Cash Award Scheme 2022 chu tehfung atan hman niin discipline 18 a huam a, hei hi thlak danglam a ni dawn. Lalnghinglova Hmar chuan, "Kalphung Thar Incentive Cash Award Scheme" kan kalpui dawn. Tuna sports incentive cash award scheme hian discipline 18 chiah a huam. Inthlan hmaa kan intiamna angin MSSC hnuaia discipline 33-te hnenah incentive cash award kan sem tawh ang - kan duang mek," tiin a sawi.

Sports Minister chuan sawi chhunzawmin, "Sorkarin infiammite banah a kai dawn, Sports coaching thlak danglam theih tumin cheng vaibelchhe 2 leh nuai 50 a bul ṭanna tur Hand Holding Scheme aṭangin min pe, infiammite aiawhin Chief Minister chungah lawmthu ka sawi e.

"Thingtlang kilkhawr thlengin sports coaching ti tak taka kalpui kan tum a, khawtlang nen ṭangkawpin PPP mode-in sports coaching leh talent identification kalpui kan tum dawn a ni," tiin infiamna lama hmalak dan tur a sawi.

Dawrpui Multipurpose Centre-ah incentive cash award semna hi neih a ni a, infiammi 416 hnena sum sem zat chu Rs. 1,10,92,000 a ni. Infiammi 416 aṭangin 276 chu mipa an ni a, hmeichhia 131 awmin contingent official mi pakua an awm bawk.

Discipline hrang hrang 15 - badminton, basketball, belt wrestling, boxing, football, hockey, tennis, sepaktakraw, shooting, table tennis, taekwondo, volleyball, weightlifting, wrestling leh wushu ten national leh international level-ah medal an hlawh chhuak.

Tun ṭum Incentive Cash Award-ah hian Lalremsiami (hockey), Jeremy Lalrinnunga (weightlifting), Lalruatfela (weightlifting) leh Cindy Lalruatpuii Colney (football) te chu international level-a lawman la thei te an ni. Sumfai la hnem ber chu olympian Lalremsiami niin nuai 14.5 a dawng. Siami hian India hmeichhe hockey team chu 19th Asian Games-ah bronze medal laksakin 2023 Women’s Asian Championship-ah gold medal a laksak bawk.

Incentive Cash Award Scheme 2022 aṭanga a lan dan chuan Olympic tel hrim hrim tan nuai 15 a dawn theih a; gold-ah nuai 100, silver-ah nuai 75 leh bronze-ah nuai 50 a ni a, amaherawhchu Olympic hnuhnung berah Mizo tel phak an awm lo.