Klopp-a'n Red Bull a zawm

Liverpool manager hlui Jurgen Klopp-a'n rei tak khelmual a hawisan thei lo. "Thathona reng ka nei tawh lo a ni," tia fans ho beisei aia hmaa Anfield chhuahsantu hi football khawvelah a lo kir leh dawn a, coach ang erawhin a ni dawn lo - Red Bull-ah global head of soccer a ni dawn.

Kum 57 mi coach hian Red Bull hi a zawm nghal dawn lo a, January 1, 2025 aṭanga a hna hi ṭan turin an inrem. Klopp chuan, "Kum 25 zet coach hna ka thawh hnua hetia hmachhawpa ka tel thei hi ka lawm hle.

"Ka hna tur chu a hma nen chuan a dang deuh a ni mai thei a, mahse, football leh he infiamnaa inhnamhnawihte tana ka thinlung zawng zawng ka pek ṭhin ang erawh kha a la ngai reng a ni," a ti.

Red Bull CEO Oliver Mintzlaff chu Klopp an lakluh theih nan a thawhhlawk hle nia sawi a ni a, ani hian rei tak chu German coach hi an lakluh ngei theih nan a lo hel tawh. Klopp hian hun rei tak atan contract a ziak nia tarlan a ni a, a rei zawng chiah erawh sawi a awm lo.

Hetihrual hian a contract-ah hian a team enkawl châk takin an rim a nih chuan a chhuah theihna dan tur an ziak tel nia sawi a ni a, a bik takin Germany-in an sawm a nih chuan chhuah a hnial dawn lo niin an sawi.

Germany coach ni mek Julian Nagelsmann hian World Cup 2026 thleng bak contract a nei lo a, Gerrmany national team sporting director Rudi Voller chuan Klopp-a'n team enkawl leh a tum a nih phawt chuan an rim tur thu a lo sawi tawh.

Energy drinks brand lar tak Red Bull hian club an nei nual a, Bundesliga club RB Leipzig, Austrian club ṭha Red Bull Salzburg, Major League Soccer club New York Red Bulls leh Brazilian club Red Bull Bragantino an nei.

Hei mai a ni lo - May 2024 khan Championship club Leeds United-ah stake an lei bawk a, Klopp hian heng club ho hi an khelh dan phung, transfer leh coaching development-ah nasa takin a pui dawn a ni.

Red Bull corporate projects & investments CEO Mintzlaff chuan, "Jurgen Klopp hi coach thiam bik leh ngainatawm, football khawvela mi ropui leh thiltithei pawl a ni. A hna thar hian football khawvela kan hmalaknaah nasa takin min pui ang," a ti a, Klopp hi ni tina club inrelbawlnaa inrawlh tur erawh a ni dawn lo.

Klopp hian player a nih laia a khelh hnuhnun berna Mainz 05 aṭanga a coaching career ṭanin, Bundesliga hial a hruai thleng. Kum 2008 khan Borussia Dortmund enkawl ṭanin, Bundesliga (2), DFB-Pokal (1) leh DFL Supercup (2) ah te a champion pui a, kum 2013 khan Champions League final a hruai thleng bawk.

May 2015-ah chawlh hahdam a mamawh thu sawiin German club a chhuahsan a, mahse, Liverpool-in Brendan Rodgers an ban avangin a chawlh a titawi a, October 2015 khan Anfield a pan. Reds mutthlu kai harhin, Premier League, FA Cup, League Cup (2), FA Community Shield, Champions League, UEFA Super Cup leh FIFA Club World Cup-ah te champion nomawi a chawipui a, Europa League final hruai thlengin, Champions League hi vawi hnih dang final a luhpui bawk a ni.

Red Bull hi infiamna khawvelah an inhmang hle. Football piahlamah hian ice hockey, extreme sports leh motorsports-ah te pawh an inhmang a, Formula 1 lamah team pahnih an nei bawk.