Argentina tan Lionel Messi a inpeih

World Cupm champion Argentina chuan Ningani zanlai dar 2:30 hian Venezuela an lenchilh dawn. World Cup 2026 Qualifier khel tur hian Lionel Messi a inpeih leh tawh a, mipui en hlawh bik a ni leh ang.

South America ram 10 inel zingah Argentina hian match riat an khelh aṭangin point 18 an nei tawh a, tlang turin la chiang lo mah se World Cup khel tur hian an tling ngei ang tih a sawi ngam tawh, hmabak tlemte an la nei.

Messi a dam

Copa America final an khelh ṭumin Lionel Messi-a kerek a hliam a, an ramin World Cup qualifier an khelh hmasa lamah pawh khan a inlan thei lo. Tunah erawh Messi a dam leh tawh - Inter Miami chu nomawi a chawipui leh der tawh.

Argentina coach Lionel Scaloni chuan, "Messi a dam ṭha, tun hnaiah match pawh a khel nual bawk a ni. Ram tan koh loh zeuh a nih chhan kha chu a hliam vang a ni a, tunah chuan team training a zawm pangngai leh thei tawh a ni," a ti.

Captain Messi a dam ṭhat lai hian midfielder Alexis Mac Allister erawh a dinhmun a chiang lo. Scaloni chuan, "Mac Allister hian mimal training chu a nei a, a ṭhiante zinga tel turin hun a mamawh deuh rih dawn," a ti a, Venezuela lakah a inlan a rinawm loh.

Khawchin thlirna aṭanga a lan dan chuan, tun kar tawpah hian Venezuela ramah ruah leh thlipui thawk thei a ni a, ram pahnih inkhel pawh hi a nghawng thei dawn niin a lang, training an neihna lamah pawh thli in harsatna ṭhenkhat a siamsak tawh niin an sawi.

Scaloni chuan, "Theihtawpin training kan nei, chutihrualin thlipui, ruah leh airport lama harsatna hrang hrangte kan ngaihtuah tel a ngai. Match khelh chu a pawimawh, a hmasa berah erawh kan nunna kan dah pawimawh tur a ni," a ti.

Chile ramah Brazil

Neymar awm loh karah Brazil an che hleithei lo - goal khung an harsat tlat ṭhin. Tunah pawh world champion vawi nga ni tawh hian Neymar an la chhawr thei dawn lo a, Zirtawpni zinga Chile an hmachhawn hunah coach Dorival Júnior-a'n a hmatawngte a rem fuh a ngai ang.

World Cup hmasa ber 1930 aṭangin Brazil hi la inlan kim thei awmchhun an ni - World Cup 2026 atan pawh an tlin leh mai a rinawm, chutihrualin ram 32 aṭanga 48 tehmeuhah tih pun ni tawh mah se, dinhmun ṭha takah an awm thei rih tlat lo.

South America ram 10 aṭangin paruk an tling nghal dawn, pasarihna chuan playoff an la khel thei bawk - tun dinhmunah Brazil hi pangana an ni mek, playoff khel phak lo zinga mi Bolivia aia an sanna chu point khat chauh a ni!

Brazil hian theihna chu an nei, an inrem fuh erawh a ngai dawn - Bracelona tana vul mek Raphinha leh Real Madrid duhlai Vinicius Junior te hian club lamah chauh ni loin, ram tan innghahna tlak an nihzia an lantir a hun tawh hle.

Si ban nghaktu rinawm Alisson Becker erawh hliam vangin a inlan thei dawn lo. Liverpool goalkeeper awm loh mah se Premier League champion Manchester City keeper Ederson an la nei tho a, goal veng tur lamah chuan an buai lo ang.