Laithanpuia'n gold medal a la

IWLF Youth, Junior leh Senior National Weightlifting Championship neih laiah, Mizo tlangval Laithanpuia chuan Mizoram tan gold medal a chhawi chhuak a, Isak Malsawmtluanga'n bronze medal a la bawk.

Himachal Pradesh, Nagrota Bagwan-a inelna neihah Laithanpuia hi 55kg huangah a khel. Mizoram aiawhtu hian snatch 99kg, clean & jerk 117, total-ah 216kg a chawi a, amah hnaih bertu Mugesh Gamango (Odisha) chuan total-ah 204kg a chawi thung.

Sairang Dinthar mi Laithanpuia hi Mizoram State Sports Council (MSSC) hnuaia weightlifting zirlai a ni a, coach Zohmangaihna kaihhruaina hnuaiah a inzir mek. Mizoram Weightlifting Association (MWA) secretary Malsawma Khiangte chuan, an nau hian theihna sang tak a neih avangin a lakah beisei an nei sang tih Vanglaini a hrilh.

Isal Malsawmtluanga chu 61kg huangah a inlan thung a, ani hian snatch 106, clean & jerk 127kg, total-ah 233kg a chawi a, pathumna dinhmun a luah thung. Malsawmtluanga chungah hian Tamil Nadu mi V. Kishore awmin, ani hian total-ah 243kg a chawi a, pahnihna chu Punbaj mi, kg 242 chawitu Sunil Singh a ni.

Tun ṭum inelnaah hian Mizoram Weughtlifting Association (MWA) chuan infiammi 12 a tir chhuak a, anni bakah hian official pathum an kal tel bawk. Inelna hi October 13 thleng neih tur a ni ang.