Liverpool keeper Alisson a chawl rei dawn!

Premier League hmahruaitu Liverpool fan-ten chanchin lawmawm lo hriat tur an nei a, goalkeeper Alisson chu a hliam vangin thla khat tal a chawl dawn - November thla laihawl hma chu a lo kir thei dawn lo tihna a ni.

Reds hian Inrinni zan khan Crystal Palace chu 1-0 in an hneh a, he inkhelah hian hliam vangin minute 79-naah lakchhuah a ngai. Champion tum Liverpool tan an keeper chhuanvawr Alisson inhliam hun hi a 'timing' lo hle.

Liverpool hian Premier League match sarih aṭanga vawi ruk hnehna changin, vawi khat an tlawm tawh a, table chung ber an luah mek. Mahse, an hnuaia awm Manchester City leh Arsenal aia an sanna hi point khat chauh a ni a, vawi khat chetsual a la pawi thui thei.

A pawi zo ta

Arne Slot-a enkawl Liverpool hi mi tam takin an la rin loh chhan chu league-ah an elpui an la hmachhawn lo hi a ni a, October international break zawhah fixture hautak an hmachhawn ve dawn chiah a, keeper Alisson an chhawr thei dawn lo.

Reds hian October 20-ah Chelsea an mikhual ang a, Champions League match khel turin October 23-ah RB Leipzig an lenchilh zui dawn. October 27-ah Arsenal mualah an leng leh ang.

Hei chauh a ni lo - Alisson awm loh chhung hian Brighton & Hove Albion (League Cup), Brighton (league), Bayer Leverkusen (Champions League) leh Aston Villa (league) an hmachhawn dawn a, Alisson a lo kir leh meuh chuan an dinhmun hi a lo danglam tawh viau mai thei!

Tu nge thlak ang?

Palace laka Alisson lakchhuah a nihin, a hmun ruakah Vitezslav Jaros a lut. Kum 23 mi keeper luh chhan hi media ṭhenkhatin an inrinsiak a, tun hnaia ualau taka first choice a nih theihna pan a duh thu sawitu Caoimhin Kelleher dah ṭhat tumna anga sawi a awm.

Mahse, Kelleher hi damlohna avanga inlan lo a ni a, inkhelh zawhah Reds boss Arne Slot chuan Irish keeper chu an number 2 a la nih reng thu a sawi. Slot chuan, "Kelleher hi number 2 a ni tih a chiang. Chuti ni lo se, Alisson inhliam hnuhnungah khan Caoimhin ni loin Vit-a'n si ban a nghak ang chu," a ti.

Alisson hi November thla laihawlah dam hman pawh ni se, inkhel tur chuan hun a duh deuh a rinawm a, November thla tawp leh December thlatir lama Southampton, Real Madrid (Champions League), Manchester City, Newcastle United leh Everton an hmachhawn hunah a la inlan theih loh chuan Reds tan a pawi ang.