Chelsea leh Forest thubuai siamsak

Pathianni zan Premier League inkhela 1-1 a inhnehtawk, Chelsea leh Nottingham Forest te chu inkhelh laia an player-te an thunun loh avangin thubuai siamsak an ni a, club pahnih hian an duh chuan an thubuai hi ngaihtuah ṭhat turin vawiin thlengin an thlen thei ang.

Stamford Bridge-a inkhelah hian Forest full back Neco Williams chuan Blues defender Marc Cucurella chu khelmual pawn lamah a nam chhuak a, heta ṭang hian buaina hi a inṭan.

English football-a thuneitu sang ber Football Association chuan buaina hi ngaihtuah zuiin, club pahnihte chu an player-te an thunun loh avangin thubuai a siamsak ta a ni.

Buaina chhuak avang hian Forest palyer Williams bakah Blues player pahnih Cucurella leh Levi Colwill te chu yellow card pek an ni a, inkhelh pumpuiah Chelsea player paruk ngawt yellow card pek an ni.

Chelsea player-ten tun season Premier League match khata yellow card paruk an hmuh tlin vawi hnihna a ni a, English top flight league dan dinglai angin Blues hian £50,000 (Rs. 54,88,215) an chawi nghal.

Blues striker Nicolas Jackson erawh player vannei zingah a tel a, tun season-a goal li khung tawh striker hian Forest defender Morato chu a beng niin a lang a, mahse, heti chung hian hrem erawh a tawk dawn lo.

Jackson leh Morato inkar buaina hi a hun laiin video assistant referee (VAR) hmanga en a ni a, hremna an pumpelh tawh.