Last 16-ah Djokovic a lut

Shanghai Masters khelh laiah Novak Djokovic tan last 16 lut turin hatsatna a awm lo - Serbian star hian Thawhlehni zan khan Flavio Cobolli chu 6-1, 6-2 in a sawp.

China rama inelnaah hian tun hmain Djokovic hi vawi li a lo champion tawh a, tun ṭumah pawh rinkai a ni. World number 30 Cobolli tan a thiam mah mah, darkar khat chuang hret bak an inkhel lo hial a ni.

Grand Slam vawi 24 champion tawh Djokovic chuan, "Ka khelh danah khan sawisel tur ka hre lo. Ka duh hunah na takin ka nawr thei a, inven a ṭul hunah ka buai lo bawk," tiin a khelh danah a lungawi hle.

Inkhel dangah Stefanos Tsitsipas chuan Alexandre Muller chu 6-3, 7-5 in a hneh - mahse Greek player Tsitsipas hian nimin tlai khan Daniil Medvedev a hmachhawn leh a, set la loin a chak lo zawkah a ṭang.

Court 3-a inkhelah Russian tlangval Medvedev hian 7-6, 6-3 in hnehna a chang a, a match lehpekah chuan world number 1 leh seeded pakhatna ni bawk Jannik Sinner a hmachhawn leh dawn a ni.

Asia khawmualpuia tennis inelna ngaihhlut zingah hian Carlos Alcaraz pawh a inlan. Spanish star hian nimin chawhnu lam khan Gael Monfils chu 6-4, 7-5 a hnehin quarterfinal a inhlangkai fel der tawh a ni.

Kum 21 mi Alcaraz chuan, "Set hnihnaah khan a service chhuhsak theihna remchang nei fo mah ila ka ti hlawhtling thei mai lo, dawhthei taka nghah a ngaih chang a awm tih ka zir chhuak thar leh a ni," a ti a, champion ngei a tum tih a sawi bawk.

Tennis season tawp lam a ni a, a thiam zual pariat inelna ATP Finals an la hmabak bawk - kumin chhunga ranking point hmu sang zualte inelna hi Turin, Italy-ah neih a ni ang.