Begiristain-a'n City chhuahsan dawn

Manchester City director of football Txiki Begiristain chuan season tawp rualin Etihad Stadium a chhuahsan dawn a, football khawvela Director lar ber pawl chhuak tur hi City tan chuan chânna nasa tak a tling ang.

Kum 60 mi football administrator hian kum 2012 khan City a zawm a, khawvela coach hlawhtling ber pawl Pep Guardiola thlem thlu tura a sul sutu a ni a, Pep-a'n City-a a hna a thawh zui dan thlir chuan a la luttu Begiristain hi lawmthu hrilh mawlh mawlh tur an ni.

Begiristain hian player a nih laiin Barcelona leh Spain-ah Pep hi a lo khelhpui tawh ṭhin a, Barcelona-a director of football a nih khan kum 2008-a coach atana Catalan club-in Pep an ruat theih nana hma latu leh sulsutu langsar a lo ni tawh bawk - Pep tan pawh a hlu.

Hetihlai hian Pep pawhin City-a a contract chu season tawp rual hian a hmang zo dawn a, tun thlengin thuthar a la nei bik lo. Spanish coach chuan kartawp inkhela Fulham (3-2) an hneh hma khan, "Season ṭantir khan ka chungchang thu ka sawi loh tur thu hi ka sawi daih tawh a, tunah pawh ka sawi dawn chuang lo. Thil thleng tur chu a thleng mai ang," tiin a lo sawi tawh.

Txiki Begiristain chhuah tur thu sawi a nih leh takah chuan a ṭhianpa Pep pawh hi a chhuak mai ang em aw, tih chu zawhna awm mek a ni a, an thubuai 115 nen City fan-te chu thin thiin an mu meuh lo mai thei!

City hian Begiristain, Guardiola leh chief executive Ferran Soriano te ho thawhhona hnuaiah English football an thunun tiin a sawi theih a, Premier League hnuhnung pasarihah khan vawi ruk an champion - a zawna a vawi li champion thei hmasa ber record an chelh mek a, a zawna vawi nga champion an tum ang.

Kum 2023 khan treble champion niin, an club chanchina a vawi khat nan Champions League nomawi an chawi a, Manchester United tih loha English club treble champion thei an ni.