East Bengal coach thar Oscar Bruzon

Indian Super League club East Bengal chuan an coach atan Óscar Bruzón an lakluh thu an puang a, Spanish coach hian Kolkata club hi engtianga rei nge a enkawl dawn puanzar a ni lo.

East Bengal hi an league match hmasa pathuma an tlawm hnuin coach Carles Cuadrat chuan September 30 khan a bansan a, coach lailawk Bino George hnuaiah match khat khelin an tlawm bawk - tun season-ah an la chak miah lo tihna a ni!

Coach thar Bruzón hi kum 47 mi niin, Indian football-ah a mikhual lo. 2012-14 season khan Goan club ṭha Sporting Clube de Goa enkawlin, Mumbai FC a enkawl tawh bawk a, Indian Super League club Mumbai City-ah assistant coach a ni tawh bawk.

Bangladeshi club Bashundhara Kings-ah a hming chherin, Bangladesh Premier League-ah a zawnin season nga a champion pui thei a, Maldives club New Radiant chu season khat chhungin Dhivehi Premier League, Maldives FA Cup, President's Cup leh Maldivian FA Charity Shield-ah te champion nomawi a chawipui.

East Bengal hian Mizo player Lalchungnunga, Mark Zothanpuia leh David Lalhlansanga te an kawl mek.