Sterling hi player danglam bik a ni tawh - Southgate

Manchester City forward Raheem Sterling-a'n Iceland an hnehna inkhelah goal awmchhun a khung a, penalty aṭanga a goal khung hi ram tana a inlan hnuhnung 12-a a goal 11-na a ni. 

Kum 25 mi forward hi England tana a inlan hnuhnung 12-ah goal 17-ah a inrawlh a, goal 11-a khung bakah hian assist vawi ruk a nei a ni - tun hnaia Sterling goal khung theih dan thlirin Gareth Southgate chuan Sterling chuan hma a sawn dawrh thu a sawi. 

England boss chuan, "A rilru puthmang hian a chhehvela awm ve player-te thlengin a thlak danglam thei a, a game hi level dang daih a ni tawh," tiin Sterling chu a fak hle. 

Three Lions hian harsa taka Iceland an hneh hnuah zanin dar 12:15 hian Denmark an lenchilh leh dawn a, Southgate-a naute hi point thum hlawh chhuak tura beisei an ni ang. 

England-in Iceland lakah 4-1-4-1 formation hmangin Harry Kane chu tlarhmaah maltlat tir a ni a, mual sir lam aṭangin Sterling leh Jadon Sancho ten Kane hi an thlawp. 

Southgate chuan, "Harry Kane hi kan goal khungtu a ni a, kan khelh danah a ṭangkai em em bawk. Tunah erawh Harry chungah chauh kan innghah a ngai ta lo," tiin Sterling-a'n goal khung a uar chho chu a lawm hle. 

England squad neih mekah Kane hian ram tan match 46 khel tawhin goal 32-a khung tawh a, Sterling-a'n goal 13 khung tawhin ram tana goal nga khung tling tawh player dang an awm lo!

Player pahnih dawta ram tana goal khung hnem ber chu Eric Dier niin ram tan match 41-a khelhah goal thum a khung tawh. Hriat tel tur erawh Danny Ings, Sancho, Mason Greenwood leh Tammy Abraham-te hi season duhawm tak hmang zo hlim vek an ni a, club tan goal khung lamah harsatna an nei lo. 

Tarlan tawh angin Southgate-a formation duh ber chu 4-1-4-1 a ni a, mahse English coach hian nakkuma khelh tur Euro 2020 thlir chungin tlarhnung lama player pathum hman chu a enchhin dawn niin an sawi.

 

Southgate hian tlarhnung laiah player pathum a dah a nih chuan wing back angin full back pahnih a dah tel ang a, midfield laiah player pahnih awmin winger pahnihin tlarhmaa striker pakhat awm chu an thlawp ang. 

England boss hian 3-4-3 hi a hmang a nih chuan Conor Coady leh Ainsley Maitland-Niles te a luhtir an rinawm a, Niles hi attthlak taka hrem tawk Kyle Walker aia lut tura rin Trent Alexander-Arnold nen wingback anga khelin tlarhnungah Joe Gomez, Eric Dier leh Coady chu inkawp tura beisei an ni. 

Iceland laka bil ṭan James Ward-Prowse aiah Mason Mount lutin Declan Rice leh Phil Foden-a kawp turah ngaih a ni a, Southgate-a'n Jack Grealish chungah rinna a nghat thar a nih pawhin a mak lo ang - tlarhma erawh Kane, Sterling leh Sancho an inkawp leh ngei a rinawm. 

England angin Denmark hian hriat an hlawh tawk lo a ni mai thei a, mahse dah hniam theih an ni lo. Si ban nghak turin Leicester City goalkeeper Kasper Schmeichel-a awm a, tlarhnunga khel zingah Chelsea defender Andreas Christensen-a awm bawk. 

Inter Milan midfielder Christian Eriksen hian Serie A club-ah beisei phak lo mah se hmanni lawka Manchester United leh Real Madrid-in an hel rawn midfielder kha a la ni reng a, inkhela danglamna thlen turin a la ṭha tawk. 

Tottenham Hotspur zawm hlim Pierre-Emile Hojbjerg pawh hi Eriksen-te 'class' ni lo mah se player thiam pangngai tak a ni a, Barcelona forward Martin Braithwaite pawh hi a tih fuh ni chuan striker hlauhawm tak a ni. 

Kum 22 mi Kasper Dolberg hi Nice tana khelin Ligue 1-a player hmuhnawm pawl ni thei a ni a, tun season league match hnih khelh tawhah goal hnih a khung tawh - RB Leipzig forward Yussuf Poulsen pawh hi dah hniam a thiang lo ang.