Aizawl FC lakah Sihphir Venghlun an tho chhuak thei ang em?
LZ Juice MPL11 semifinal second leg-ah zanin dar 8:00 hian Sihphir Venghlun leh Aizawl FC te an inkhel dawn. I League club hian first leg-ah 2-0 in hnehna an chang a, Sihphir Venghlun tan hmabak a harsa tawh hle.
Chutihrual chuan football-ah chuan engpawh thleng thei a ni a, first leg-ah Sihphir Venghlun chak lo mah se minute 90 chhungin an khel ṭha zawk. Result aṭanga teh lo a, an khelh dan aṭanga teh chuan Robert Laldinthara hote tan beisei tur a awm.
First leg chu
Aizawl FC-in khelh ṭan chiahah goal an khung nghal a, Augustine Lalrochana cross chu Sihphir Venghlun goalkeeper Lalhruaizela'n man pialin Lalhriatpuia'n goal-ah a chantir nghal.
Sihphir Venghlun khelh danin awmzia a nei zawk a, mah se goal chance ṭha insiam an harsat a, an hun ṭha neih an hmang ṭangkai thei lo. Aizawl FC pawhin chance ṭha neih hmang ṭangkai lo mah se injury time-ah penalty an hmu a, Lalrinzuala'n goal-ah a chantir.
I League club dinhmun ṭhaa dahtu chu penalty a ni a, Sihphir Venghlun erawh an penalty chawi danah an lungawi lo. Laltlanzova ball cross tur chuan C. Zohmingsanga ke a per hnuah a kut a fuh zui a, referee-in penalty a pe.
Robert Laldinthara hoten goal hnih an chhuah miau avangin penalty shootout thleng tur pawhin goal hnih tala an chak a ngaih phah a, minute 90 chhunga hnehna chang nghal tur phei chuan goal thum an khung tlin a ngai.
Risk lak a ngai
Sihphir Venghlunin first leg-ah fimkhur takin an khel a, second leg-ah erawh risk an lak a ngai. Coach Robert Laldinthara chuan, "Team ṭha kan la tum dawn avangin kan fimkhur tho a la ngai. Mahse, goal kan mamawh avangin risk kan lak tel ve a ṭul tawh. Player pathum vel chu kan siksawi ka ring," tiin Vanglaini a hrilh a, tum mumal an nei dawn.
Sihphir Venghlun hian tun season MPL-ah goal 22 an khung thei a, chutihrualin Aizawl FC vawi thum an hmachhawn tawhah goal khat chiah an la khung. Robert-a'n tlarhma lam a siksawi ṭhat mai ni loin khelh dan a thlak hret a ṭul a rinawm.
Aizawl FC laka goal khungtu Lalthanpuia (Tepuia) hi Sihphir Venghlun tlarhma zinga hriam ber a ni a, MPL11-ah goal riat a khung tawh. Zaninah Sihphir Venghlunin I League club an hneh dawn a nih chuan Tepuia'n a theihna a phochhuah a ngai a, chutihrualin a ṭhianten an thlawp ṭhat a pawimawh bawk ang.
AFC an buai?
First leg khelh hmain Aizawl FC-in inkhel pahnih atana an inpuahchah thu an sawi a, I League club hi an squad a chhah ṭhat avangin second leg atana inpeih viau tura ngaih an ni.
Mahse, Aizawl FC hian hliam vangin player pawimawh pathum Lalbiakdika, Samuel Lalmuanpuia leh Lalmuanpuia te an chhawr theih a rinawm lo. BD-a hi MPL11-a goal khung tam ber a ni a, goal 12 khung tawh mah se a ke phahah hliam a neih avangin second leg-ah inlan lo thei dinhmunah a ding.
Champhai Zotlang tlangval hian MPL season khata goal khung tam ber record nih rual turin goal khat a la mamawh a, a inhliam a nih chuan record siam lo thei dinhmunah a ding. First leg-a man of the match-a thlan Samuel-a chu ke rek hliam vangin a khel thei dawn lo a, Zemabawk North pa thlak hi a harsa dawn.
Samuel-a thlak thei tur chu Lalawmpuia Sailo a ni a, MFA Grassroots chhuak midfielder hi Churchill Brothers-ah te a khel tawh a, coach Victor-a'n midfield thunun turin theihna a neih thu Vanglaini a hrilh. Lalmuanpuia erawh malpui (hamstring) hliam vangin first leg a khel thei tawh lo a, final thleng pawh ni se MPL11-ah a inlan a rinawm tawh lo.
Mahse, Aizawl FC erawh tualchhung football-ah chuan duh ang tawka bazar thei an ni a, duh thlang thei club an nih avangin tuna player an neihte hi Sihphir Venghlun hmachhawn turin an la ṭha tawk.
Aizawl FC coach Victor chuan, "Ka player-te hi ka ringtawk a, dam kim vek thei se chu duhthusam a ni. Chutihrualin an dam kim lo a nih chuan midang tan hun ṭha a inher chhuakah ka ngai a, a hun ṭha neih hi an bawhpelh loh ka beisei," tiin Vanglaini a hrilh.
I League club striker C. Lalhriatpuia'n goal kua a khung tawh a, BD-a goal thum chauhin a phak tawh lo. Farkawn/Republic Veng tlangval Hriata tan top scorer beiseina a la inhawng a, goal khung tam ber nih a tum a nih chuan zanin hi hun ṭha a ni.
Chutihrualin Lalrinzuala bawk hi en bik tur a ni leh ang. MPL10 top scorer hi bench aṭangin match hnuhnung pahnihah a lut a, goal a khung ve ve. Second leg-ah pawh bul a ṭan aiin bench aṭangin a luh a rinawm zawk a, a lut a nih chuan Sihphir Venghlun tlarhnungin hna an ngah sawt ang.