Silvan-a, Jeremy leh Hunthara ten medal la

IWLF Youth, Junior leh Senior National Weightlifting Championship neih laiah - Mizoram tan Silvan Beihrothatlo chuan Junior 67kg huangah silver medal a chawi chhuak.

Himachal Pradesh, Nagrota Bagwan-a inelna neihah hian Jeremy Lalrinnunga leh Lalhunthara te pawh Services tan an inlan a, Mizo tlangval pahnih hian bronze leh silver medal an chhawi chhuak ve bawk a ni.

Mizoram aiawhtu Silvan-a hian snatch 122, clean & jerk 150kg, total-ah 272kg a chawi a, pahnihna a ni. A tluk loh chu Maharashtra aiawhtu Yash Khandagale niin, ani hian total-ah 281kg a chawi thung.

Jeremy Lalrinnunga chu hun rei tak hliam vanga a chawlh hnuah a inlan ve leh ta, senior 67kg huangah inlanin pathumna dinhmun a luah. Lalhunthara chu 73kg huangah inlanin silver medal a la thung a ni.

Jeremy-a hian 294kg a chawi a, a chungah Railway aiawhtu pahnih T. Madhavan (295kg) leh Neelam Raja (295kg) te an awm.

Lalhunthara'n snatch 127kg, clean & jerk 171kg, a pumpuiah 298kg a chawi, a tluk loh awmchhun chu Ajith niin, ani hian 318kg a chawi tling thung a ni.

Inelna hi October 6-13 chhunga neih tur niin, a tir lamah Mizoram tan Laithanpuia chuan 55kg huangah gold medal a lo chawi chhuak tawh bawk a, Mizo infiammite an che ṭha rih hle.

Mizoram Weightlifting Asso-ciation (MWA) aiawha feh chhuak zingah - Lalchhanhimi, David Lalzawmdika, David Zohmingmawia leh Zosangzualite chuan inelna an la hmachhawn dawn bawk a ni.

MWA hruaitute hnen aṭanga Vanglaini thu dawn dan chuan, inelna la hmachhawn tur zingah pawh medal la thei dinhmuna ding an awm tura ngaih a ni.