George Baldock-a thiin an chhar!

Sheffield United defender hlui George Baldock chu Nilaini zan khan a thi, a thih dan tak hi sawi chian theih a la nih loh avangin infiamna khawvelah titi a ti tam hle.

Kum 31 mi Baldock hi Athens chhim lama a chenna Glyfada-a swimming pool-ah thia chhar a ni a, police lamin a nun chhan tumin theihtawp chhuah mah se an chhan hman ta lo.

English club Blades tan season sarih a hman hnuah, nipui bazar lai khan Baldock hian Greek club Panathinaikos hi a zawm, football khel turin zinkawng la nei nual mah se a hun a tawp ta zawk a ni.

Baldock chhungkua chuan thuchhuah siamin, "George-a thihna hian min barakhaihin hrehawm kan ti hle. Hmun hrang hrang aṭangin zawhna kan dawng a, a thih thu hi kan nemnghet," an ti.

A khelh mekna Panathinaikos pawhin George an ui thu leh a barakhaih thu an sawi bawk. Greek club tan hian match li a khel hman a, kar tawpa Olympiakos nen goal lut loa an inhnetawk ṭum pawhin a inlan.

A club hlui Sheffield United chuan thlahna thu sawiin, "Bramall Lane-ah season sarih hun a hman hnuin nipui lai khan min chhuahsan a, a khelhpui ṭhin player, coaching staff leh fans lam chuan kan ui takzet.

"Sheffield United chuan George chhungkua leh a ṭhiante kan tawrhpui takzet," an ti a, an club tana match 2016 khelhsak hmantu player chu ui tak chungin an thlah a ni.