Tun hnaia ka khelh ṭhat ber - Djokovic

Novak Djokovic chu Shanghai Masters khelh laia Roman Safiullin a hneh danah a lungawi hle a, tun hnaia tennis match a khelh hoah chuan a chet ṭhat ber ṭum a nih hial thu a sawi.

Nilaini tlai khan Serbian star hian Russian player Safiullin hi 6-3, 6-1 in a sawp a, a thiam zual pariat zinga inhlangkai turin harsatna a tawk lo - vawiin tlai hian rawlthar Jakub Mensik nen semifinal luh an inchuh leh ang.

Kum 37 mi Djokovic chuan, "Taksa leh rilru lama harsatna nei miah loa duhtawk maia inkhelh theih hi chu a nuam ṭhin, tennis ball hi chuan hlimna leh lawmna tam tak min siamsak ṭhin.

"Tun ang hunah pawh ṭha takin ka la khel thei ang tih hi ka ring ṭhin a, chuvang chuan tun thlenga tennis la khel ve reng pawh ka ni, beiseina kan neih tawh loh chinah chuan awmzia a awm tawh lo ang," a ti.

Djokovic hi hripui Covid-19 vanga harsatna tawk nasa zinga mi kha a ni a, invenna a lak duh loh avangin ram ṭhenkhatah chuan tournament khel tura a zin luh pawh phalsak a ni ṭhin lo - Shanghai Masters pawh hi 2019 hnua a khelh lehna hmasa a ni hial.

Tun dinhmuna world number 4 Djokovic hian season kal laiah Grand Slam title a la miah lo, mahse an ram tan Paris Olympic gold medal a la, nomawi 99 a lak tawh zinga a ngaihhlut bik a nih thu a sawi hial a ni.

Tennis player ropui Jimmy Connors (109 titles) leh Roger Federer (103) te a hnaih ta hle a, tun ṭumah hian a champion thei a nih chuan nomawi 100 la tling thei pathumna a ni ang, chumi tur chuan vawi thum chak a la hmabak.

Djokovic kalkawngah hian Alexander Zverev chu hautak tura ngaih a ni a, mahse seeded pahnihna Zverev hian beisei a phak lo - Belgian veteran David Goffin lakah 6-4, 7-5 in a chak lo.

Kumin June thla kha chuan Goffin hi world number 100 zingah pawh a lang phak lo, mahse tun hnaiah zawimuangin hma a sawn leh ta hle - Wimbledon 2022 hnuah tun ṭumah hian a vawi khat nan ATP 250 level chinah quarterfinal a thleng ve leh ta a ni.

Tun season tawp hmain ranking sang zual pariat inelna ATP Finals an la hmachhawn dawn a, tuna khelh lai Shanghai Masters bakah title hlu dang lak belh theih dang pawh a la awm tihna a ni.