DD Mizoram Indigenouse Games 2024-in ngaihhlut a hlawh

Mizorama tualṭo infiamna tihlar lehzual a nih theihna atana buatsaih Mizoram Indigenous Games 2024, Aizawl District bik chu nimin khan Bawngkawn South YMA Hall-ah hlawhtling takin a hmawr bawkna neih a ni.

Mizoram Indigenous Games 2024-ah hian Mizo tualṭo infiamna insuknawr, insaihruipawh, inbuan, inarpathai leh inkawibah-te hmanga inelna buatsaih a ni a; mimal inelna insuknawr, insaihruipawh leh inbuan te hi category pathum pate, palaihawl leh palianah te an ṭhen darh.

A chak berte

Insuknawr pate-ah hian mi 15 telin Zemabawk tlangval Lalṭhapuia chu pakhatna a ni a, palaihawlah mi 14 telin Chaltlang tlangval Joel Lalengmawia chu a chak ber a, palian inelnaah Kelsih tlangval Lalhriatrenga pakhatna a ni bawk.

Insaihruipawh pateah mi 11 an tel a, Sesawng tlangval C. Lalruatdika chu pakhatna a ni a, palaihawlah mi pakua telin R. Lalremtluanga chak berin palian inelnaah 10 telin Sesawng tlangval T. Lalsangliana chu pakhatna a ni.

Inbuan pateah mi 12 an tel a, Mission Vengthlang tlangval Melvin Zothankima chu pakhatna a ni a, palaihawlah mi pasarih telin Bethlehem VT tlangval Remruatpuia a chak ber a, palianah mi paruk telin Upper Republic tlangval Lalsangliana chu a chak ber. Sangliana hi Mizo inchai champion lai a ni.

Team anga inelna inkawibahah Venghlui pakhatna an ni a, inarpathaiah Tuivamit pakhatna an ni bawk.

Branch 20

Tun ṭum inelnaah hian Branch 20 an tel a, chungte chu Durtlang Leitan, Chawlhhmun, Mission Vengthlang, Chaltlang, Tachhip, Sesawng, Bethlehem Vengthlang, Vaitin, Zembawk, Durtlang, Bawngkawn, Tuivamit, Zuangtui, Kelsih, Ramthar, Ramhlun South, Upper Republic, ITI Veng, Venghlui leh Bawngkawn South te an ni.

Infiammi mipa tel zawng zawng hi 138 an ni a, hmeichhe tel zawng zawng hi 48 niin infiammi belhkhawm hi 186 an ni.

Engtin zel?

Inelna hi Broadcasting Infrastructure & Network Development (BIND) hnuaia Doordarshan Kendra, Mizoram - Mizoram Indigenous Games Association (MIGA) leh Central Young Mizo Association (CYMA) ṭangkawpten an buatsaih a ni.

Nimin khan Aizawl District-ah inelna zawh a ni a, district bika inelna tawpna ber tur chu Lawngtlai District-ah October 31 aṭanga November 1, 2024 chhung hian neih leh tur a ang. District inelna a lawmman la pha chinte inelna tur Grand Finale chu November 20-22, 2024 chhungin Aizawl District-ah neih leh a ni ang.