Medvedev hnehin Sinner a tlang

Jannik Sinner chuan nimin chhun khan Daniil Medvedev chu straight set hmangin a hneh a, inelna neih mek Rolex Shanghai Masters-ah semifinal a in vaw kai.

Qizhong Forest Sports City Arena-a inkhelah Sinner hian harsatna lian tham a tawk lo, world number 1 tan seeded pangana Medvedev hi talbuai theihna tura ngaih ni mah se, harsa lo tak 6-1, 6-4 in a hneh.

Italian tlangval Sinner chuan, "Ka beisei phak baka ṭhain ka khel chhuak. Medvedev kha a dar a na deuh niin ka hria a, a theihna sang ber a hlan theih loh avangin ka tan kawng a awlsam phah deuh ni pawhin a lang.

"A rang thei ang bera dam leh turin duhsakna ka hlan, ka tan erawh eng hneh pawh ni se thil lawm awm a ni a, ka hmabak atan inrintawkna min siamsak bawk," tiin a sawi.

Tun hma chuan Sinner hian Medevedev hi an intawn hmasa parukah a ngam lop vek - Miami Open 2023 final aṭang khan thawnthu a danglam ta, a hnu lamah chuan a hneh ta zel a ni.

Kum 23 mi Sinner hian tennis season kal laia Masters 1000 huangah semifinal vawi nga a lut tling ta chiah a, nomawi chawi turin match hnih chak a la hmabak - nizan khan Carlos Alcaraz leh Tomas Machac te an inkhel a, result kan hre hman lo.