Sabalenka tan hna a awlsam

Hmeichhe tennis world number 2 Aryna Sabalenka chuan harsatna lian tham tawk loin Wuhan Open third round a lut a, a elpui Iga Swiatek inlan ve lo chu khawhar thlak a tih thu a sawi.

Nilaini zan Centre Court-a inkhelah, seeded pakhatna Sabalenka hian Katerina Siniakova chu 6-4, 6-4 in a hneh a, tun season kal laia a vawi 50 nan hnehna a chang.

China rama inelnaah hian Swiatek chu a inlan ve lo thung - Polish nula hi kum thum chhung a thawhdun pui tawh coach Tomasz Wiktorowski nen an inṭhen a, tun ṭuma a inlan loh chhan erawh mimal thil vang niin a sawi.

Sabalenka chuan, "Iga-i hi awm ve thei se chu duhthusam a ni, a chhan chu inelna boruak a awm hian tennis leh infiamna khawvel tan thil ṭha a ni," a ti. Kum 26 mi hian last 16-ah chuan Yulia Putintseva a hmachhawn leh ang.

Season hmasa khan Sabalenka hina Swiatek nek chhuakin world number 1 a ni zuai a, mahse chawlhkar riat bak a awm hman lo - Swiatek bawkin rawn nek chhuak lehin tun thlengin hmun sang ber a luah zui.

Inkhel dangah Coco Gauff pawh a chak - China Open champion hlim Gauff hian Viktoriya Tomova chu 6-1, 6-2 in a hneh. America star hi tun hnaiah a zawnin match sarih a chak ta, a match lehpekah chuan Marta Kostyuk a tum leh ang.

Seeded 13-na Marta Kostyuk hi a vannei, a khingpui tur Amanda Anisimova chu chawn hliam vangin a inhnukdawk a, inkhelh hah ngai loin round sang zawk a luh theih phah a ni.

Wimbledon champion Barbora Krejcikova pawh a chak - a khingpui world number 102 Hailey Baptiste chu darkar khat leh minute 34 chhungin 6-3, 7-5 in a hneh a, a match dawt lehah chuan Russian mi Ekaterina Alexandrova a tum ang.