Germany tan goalkeeper thar

Zanin dar 12:15 hian Germany-in Nations League-ah Bosnia and Herzegovina an hmachhawn dawn a, Julian Nagelsmann-a goalkeeper thlan tur hriat a châkawm tawh hle. Manuel Neuer a chawlh tawh avangin Marc-Andre ter Stegen chu no. 1 thar a ni a, mah se Barcelona keeper hi khup hliam vangin a chawlh rih a ṭul dawn.

Tuna Germany squad-a awm goalkeeper pathum Oliver Baumann, Alexander Nubel leh Janis Blaswich te hi ram tan an la inlan lo vek a, zaninah vannei an awm dawn. RB Leipzig keeper Blaswich hi Ter Stegen inhliam hnua koh chauh a nih avangin a inlan a rinawm loh.

Kum 34 mi Baumann hi September 2020 khan Nations League khel tur squad-ah dah a ni tawh a, ṭum Euro 2024-ah khan squad-ah a awm bawk. Hei vang hian Baumann hi khel tur bera rin a ni.

Kum 28 mi Nubel hi Bayern Munich-in Neuer thlakna tura an lakluh a ni a, mahse Neuer-a'n inkhelh a la chawlhsan loh avangin loan-in VfB Stuttgart-ah a khel mek. Germany youth team tan Nubel hi a inlan tawh a, Euro 2024-ah preliminary squad-ah awm mah se final squad a chang pha lo.

Germany squad aṭangin hliam vangin Kai Havertz leh Jamal Musiala bakah David Raum, Benjamin Henrichs leh Robin Koch te an inhnukdawk a; Robin Gosens leh Kevin Schade bakah ram tana la inlan lo Jamie Leweling leh Jonathan Burkardt te chu koh belh an ni.