Spain coach Luis de la Fuente a lawm lo
Euro 2024-a Spain champion puitu Luis de la Fuente chu Spanish Football Federation lakah a lawm lo a, UEFA Nations League leh Euro-a La Roja a champion pui chung pawha contract thar zawrh a ni lo chu a lawm loh thu a sawi chhuak piap mai!
De La Fuente chuan, "European champion nih ve a, contract thar ka la nei lo hi chu thil mak tak a ni. Luis Enrique te ang coach kha ni zawk ta se, hetiang hi a thlen ve kher ka ring lo," a ti a, a hming lansarh tawk loh vanga ngaihsak hlawh loah a inngai.
Spanish coach chuan sawi zawmin, "Sawmnate pawh ka dawng ve ngei a, hei hi chu thil thlen dan pangngai a ni. A nih loh dan tura thil thleng chu, European champion ni chunga contract ka nei lo hi a ni.
"Spain Under-21 aṭanga senior team enkawl tura tih ka nih khan hetiang dinhmunah chiah hian ka lo ding tawh a, contract thar nei tawh ila chu a fuh khawp ang," a ti a, Spanish football thuneitute a nawr.
De la Fuente contract awm lai hi Euro 2024 zawh thleng chauh kha a ni a, kum khat dang pawhsei theih dan a awm. Spanish Football Federation leh De la Fuente hi contract thar chungchangah an inrem daih tawh a, mahse, contract tak hi tun thlengin an la ziahpui lo - a awmzia takah chuan contract nei loin Spain national team hi a enkawl rih tihna a ni.
Alaves coach hlui hi European football-a ram langsar coach-ah chuan a hlawh tlem fal viau a, a contract hmasaah kha chuan kum khatah €600,000 (Nuai 550.8) a hlawh ṭhin a, a contract thar hi a ziak a nih chuan kum khatah euro maktaduai 1.8 (vaibelchhe 16.52) a hlawh tawh dawn thung.
La Roja hian October 12, Inrinni zan dar 12:15-ah UEFA Nations League match khel turin Denmark an mikhual ang.