Season tawpah Nadal a chawl dawn tih a chiang ta!

Rafael Nadal chuan tun season bak tennis a khel dawn tawh lo - Spanish star hian November thla a khelh tur Davis Cup Finals chu a inlanna hnuhnung ber tur a nih thu a ti chiang ta a ni.

Kum 38 mi Nadal hian season hmasa French Open khelh dawn kha, kum 2024 hi atan hun hnuhnung a nih tur thu a lo sawi tawh. Tun season hman lai khan a chawlh hun tur an zawt fo a, mahse chiang takin a chhang ngai lem lo.

Nimin khan Nadal chuan thu chhuah siamin, "Tennis zinkawng ngaihnawm tak ka zawh a, tun hnaiah a bik takin kum hnih chhung chu hliam vangin a harsa hle, tunah chuan professional tennis ka chawlhsan hun a lo thleng dawn ta.

"Theih ni se la chuan hun rei tak chhung inkhelh pawh ka duh, mahse tuna ka dinhmun chuan a tlin tawh lo," a ti a, an ram tan a hun hnuhnung a hmang dawn tihna a ni a, hlawhtlin a chakna a sang zual ngei ang.

Spanish star Nadal hian Grand Slam nomawi 22 a chawi a, ani aia chawi tam chu Novak Djokovic chauh a ni - Serbian player hian major title 24 a nei thung a, ani hian tennis a la chawlhsan lo thung a ni.

Major title 22 bakah Nadal hian Olympic gold medal a la bawk, an ram tan Davis Cup nomawi vawi nga ngawt a lak bawk avangin a sulhnu hi engti zawng maha sawi nep theih a ni ngai lo ang.

Nadal chuan sawi zawmin, "Davis Cup ka khel dawn a, ka match hnuhnung ber chu kan ram tan a nih dawn avangin ka phurin la chak tawh hle bawk," a ti. Davis Cup hi November 19-24 chhunga khelh tur a ni.