Al-Nassr-in KDB an duh

Saudi Pro League club lar Al-Nassr chuan Manchester City thiampuipa Kevin de Bruyne chu lakluh an tum niin khawthlang media-te chuan an tarlang a, Cristiano Ronaldo khelhna club hian kar khatah pound maktaduai khat hlawhtir an inhuam.

KDB hian kar khatah £400,000 a hlawh mek a, mahse, Belgian midfielder hian European football kalsan mai a tum loh thu hi a lo sawi fo tawh - khawthlang media-te tarlan anga Al-Nassr hian heti zat pek an inhuam tak tak a nih erawh chuan a tan hnar a harsa ang.

Kum 33 mi De Bruyne hian Manchester City-ah season tawp rualin a contract a hmang zo tawh dawn a, a kum tam tawh avang leh hliamin a tlakbuak fo avangin City lam thuneitute hian contract thar an zawrh lawk duh rih lo nia sawi a ni.

KDB hian season hmasa kha hliam vangin City tan match 41 ngawt a khel thei lo a, a hlawh tam bawk si avangin Manchester khaw club hian chelh loh an pawi ti lo niin khawthlang media ṭhenkhat chuan an tarlang.

Belgium international hian tun season-ah City tan inelna hrang hrangah match ruk khelin goal khat a khung a, assist vawi khat chiah a nei.