Raúl-a'n Real reserve team enkawl tawh dawn lo

Real Madrid legend Raúl chuan an club reserve team Real Madrid Castilla a enkawl mek a, mahse, coach puitling ni tura inchher hriam mek, kum 47 mi coach hian season tawpah chuan Real B team hi a enkawl tawh dawn lo.

Spanish media-te chuan Raul hian season tharah Real hi a la chhuahsan dawn chuang lo niin an sawi a, chuti a nih chuan Carlo Ancelotti kaihhruaina hnuaiah assistant coach hna emaw administration lamah hun a hmang dawn niin a lang.

Real fachuam Raul hian a vanglai khan Spanish club tan hian match 741 khelin goal 323 ngawt a khungsak a, nomawi tam tak zingah La Liga-ah vawi ruk champion puiin, Champions League nomawi vawi thum ngawt a chawi bawk.