World Cup 2018 final rematch: France vs Croatia

UEFA Nations League khel turin France chuan zanin dar 12:15-ah Croatia an mikhual dawn a, World Cup 2018 final rematch a nih avangin inkhel hmuhnawm a beisei 

ngam ang.

Chutihrual chuan Croatia hian an chhuan­vawr Luka Modric leh Ivan Rakitic chu chawlh hahdamna hun pein squad-ah an telh lo a, Portugal lakah 4-1 in an mualpho tawh. 

Croatia hian mualpho nawn an duh dawn lo a, hei hian inkhel hmuhnawmna a belhchhah ang - Modric leh Rakitic aia khel tur hian Inter Milan midfielder Marcelo Brozovic leh Chelsea midfielder Mateo Kovacic an nei tho a, chhe ta hluai anga sawi an rem lo. 

Treble champion hlim Bayern Munich tana player pawimawh ni phak Ivan Perisic pawh hi inkhel danglamna thlen thei tur khawpa player thiam bik a ni a, Hoffenheim striker chhuanvawr Andrej Krama­ric hian goal khung turin theihna sang tak a nei bawk. 

Mualneitu France hi team ṭha tak ni mah se an result hnuhnung ber avanga Croatia hmusit thei an ni bik lo a, world champion hian an match hnuhnung berah Sweden chu 1-0 in hneh mah se an goal khung hi minute 90 chhunga target-a an pet awmchhun a ni. 

France boss Didier Deschamps-a'n Sweden an hmachhawn hma khan tactic hrang hrang enchhin a mamawh thu a sawi a, hei hi Euro 2020 inbuatsaih nana ti a nih thu a sawi. 

Sweden lakah 3-4-1-2 formation a rawn hmang a, Croatia lakah hian eng ang takin nge an rawn inrem dan hriat a châkawm hle - Sweden laka goal awmchhun khungtu  Kylian Mbappe leh Antoine Griezmann erawh bul ṭan ngei tura beisei an ni.