Mahrez leh Laporte ten Covid-19 an kai

Manchester City winger Riyad Mahrez leh defender pawimawh Aymeric Laporte-te chuan Covid-19 an kai tih hmuhchhuah a ni a, City chuan player pahnih hi an taksaah hri an kai tih a lanchhuah loh thu an sawi. 

Kum 29 mi Mahrez leh kum 24 mi Laporte-te hian Covid-19 an kai avang hian team training an zawm thei dawn lo a, UK sorkar dan leh Premier League kalphung zawmin an inkhunghrang rih ang - UK sorkar danah chuan ni 10 tal inkhunghrang tur a ni. 

Manchester City hian September 20 zanah season thar atana an Premier League match hmasa ber chu Wolverhampton Wanderers nen an khel dawn a, player pahnih hi an inlan theih dawn leh dawn loh a la chiang lo. 

City chuan, "Club chhungkua chuan Riyad leh Aymeric hi dam thuai turin kan duhsakna sang ber kan hlan a ni," tiin thuchhuah an siam. 

Mahrez hian season hman zawh takah khan City tan inelna hrang hrangah match 50 khelin goal 13-a khung a, assist vawi 16-a nei bawk - Pep Guardiola enkawl team tan player ṭangkai a ni. 

Laporte hian season hman zawh takah khan hliam vangin match 20 chauh a khel thei a, Pep-a nauten Premier League-a beisei an phak loh chhanah French defender inhliam hi expert tam tak chuan an puh.