Super Saturday : RG Stadium-ah inkhel hmuhnawm bik : Zanin dar 8-ah Mizoram Police Vs Chanmari
LZ Juice MPL11-ah zanin dar 8:00 hian inkhel hmuhnawm bik chhawpchhuah a ni dawn. MPL leh I Day Football champion lai Mizoram Police-in I League 2 tling hlim Chanmari FC an inkhel dawn a, semifinal second leg hi first leg inkhel result avangin en a châkawm sawt.
October 8, Thawhlehni zan khan first leg khelh a ni a, rinkai loh zawk Mizoram Police 2-1 in an chak a, Lalbiaksanga Colney hote tan final lut turin zanina 'draw' a tawk. Chutihrualin Lalsangzuala Hmar hote tan chak ngei ngei a ngai thung.
Kumin I Day Football semifinal rematch-ah hian Police an chak nawn thei a, Chanmariin an lehthal thei a, penalty shootout thlengin a beisei theih. Tualchhung football tui chin tan chuan hmaih phal chi a ni lo.
Police nge nge
Chanmari FC chhungkua tan chuan 'Police nge nge' tih hi thil hriat hrehawm tak a ni ngei ang. MPL10 final-ah Chanmari mipuiin nomawi chawi ngei inbeiseiin RG Stadium an pan a, player 10-a khel Police hneh loin kut ruakin an haw.
Santosh Trophy hnuhnung bera Mizoram team enkawltu Lalsangzuala Hmar an la lut a, an beisei ang ngeiin result pawh an nei ṭha. I League 3 group stage leh final round-ah an khingpui an hneh vek a, nuam sa takin MPL11-ah semifinal an lut bawk.
Mahse, Sanga hote hian I Day Football semifinal-ah Mizoram Police an hneh lo a, BS-a hoten Chanmari an hliam nawn. Tun ṭum semifinal-ah pawh Chanmari hi rinkai zawk ni mah se first leg-ah Police an chak tlat.
Harsatna nei Police
Hliam vangin Mizoram Police an buai mek a, first leg-ah defender pawimawh leh MPL best defender ni lai Lalhmunmawia chu hliam vangin an la chhuak. Hualngohmun pa Ahmuntea hi a thluak a vung avangin second leg a la khel thei lo.
Police hian right back rorum Lalrinzuala leh goalkeeper ṭha mi F. Lalmuanawma te chu khup hliam vangin an chhawr thei tawh lo a, coach BS-a tan ngaihtuahna sen a ṭul leh zual dawn.
Muanawma aia lut R. Malsawmkima a che ṭha a, goalkeeper chu buaina a awm lo. Chutihrualin penalty shootout an thleng a nih chuan Muanawma thlak zawh a har ang. Tlarhnungah Rinzuala aiah Lalrinchhana a lut a, Ahmuntea aiah pawh first leg-a amah thlaktu B. Zoramthanga tho a luh a rinawm.
Defence laiah FC-a leh B. Sena te an inkawp dawn a, an la inkawp tam bik lo hle. Mual vei lama awm Lalruatpuia erawh MPL10 an champion kawnga player pawimawh a ni thung. Police hian tlarhnung thar an hman dawn avangin midfield aṭanga thlawptu an mamawh dawn a, MPL best player ni lai H. Lalbiakthanga a pawimawh ang.
Police team chu
Kawnpui/Armed Veng midfielder BT-a'n a hna a hriat chian lehzual a ṭul dawn a, a hna chu goal nawr pui lam ni loin goal venhimpui a ni dawn. First leg-ah R. Malsawmtluanga'n bul a ṭan a, MS-a hian bul a ṭan nawn a nih chuan Police tan a tawnhriat a hlu khawp ang.
MS-a hi ball pawt muang thiam a nih bakah 'killer pass' pe thei a ni. Police ti Police-tu captain Lalfakzuala leh F. Lalrinpuia ten bul an ṭan nawn a rinawm a, Fakzuala hi set piece-ah chauh niloin inkhelah pawh a ṭangkai. Valpuia hi hliamin a tihbuai avangin a khelh dan a thlak hlawk a, defender awlsam takin a tlan pel thei tawh lo tih a hria - a ṭul hunah chuan freekick a hlawh chhuak thei tlat.
F. Lallawmkima, Michael Lalbiaksanga leh Isaak Malsawmkima te hming lam hmaih a thiang lo. Police-in final an lut dawn a nih chuan heng player-te hian mawhphurhna an lak theih a ṭul. Khawbung tlangval Lawma hi MPL10-a Police champion-na kawnga player pawimawh a ni a, a thawhrimna ringawt pawh hi team tan ṭhatpui tham a ni a, goal hmaah a hlauhawm tel. Tlangmawi tlangval Michael hian theihna a nei sang a, I Day Football final-a Aizawl FC laka a chet anga a chet phawt chuan Chanmari tan buaipui tham a tling ang. Isaak-a hi a tlan thei a, ball a thiam tel a, goal khung thei player a ni bawk.
Hliam tuar Chanmari
Chanmariin Police lakah phuba lak an duh dawn a, final an thleng zo lo a nih chuan coach ṭha Lalsangzuala Hmar tan chuan hlawhchhamna a ni thei ang. Hei vang hian Chanmariin sa huai an ser dawn a, an ṭhat dan berin Police hi an nuai nghal ṭhawt ang.
Chutihrualin Chanmari hi an squad a chhah ṭhat avangin an ṭhat dan ber hi hriatthiam a har hle. Second leg-ah goalkeeper Zothanmawia inlan thei dinhmunah a ding a, defence lai bik erawh an thlak danglam lo thei bawk. Player ngai bawk hmang pawh ni se, an danglamna na tur chu second leg-ah chuan an hahdam tawh dawn.
Goal an mamawh dawn avangin goal nawrtu lamin en bik an hlawh dawn a, chutihrualin defence leh forward thlunzawmtu Malsawmzuala erawh a pawimawh ngaiin a pawimawh reng ang a, striker-ah pawh a dam ṭha a nih phawt chuan Lalkhawpuimawia (Mapuia) aia thlan tur an awm chuang lo.
Mapuia thlawp turin MS Dawngliana'n bul a ṭan thei a, Dawngtea hi goal hmaa a hriam avangin bul a ṭan mai pawh a rinawm. Mual sir lamah Sanga'n duh thlan tur player a nei a; KC Malsawmsanga, Lalrokima, Joseph Lalvenhima leh Moses Lalrinzuala te an awm a, tupawh lut se Police tlarhnung chhaih buai thei tur an ni.
En châkawm chu
Zanin inkhel hi final tluk pha inkhel a ni dawn a, MPL club lian pahnih Police leh Chanmari inkhel a nih avangin boruak a awm nghal tawp. Hei bakah hian coach inhal tak pahnih BS-a Colney leh Sanga te an inhmachhawn dawn a, tlawm an duh lo ang.
Tualchhung football record thlirin tun dinhmunah Sanga hian record a nei ṭha lawr lak a, chutihrualin Police hian BS-a hnuaiah nomawi pawimawh pathum MPL, I Day Football leh All India Police Meet te an chawi vek.
Zanin hi khelmual chhunga player-te inbeihna chauh ni loin khelmual pawn lama coach inbeihna a ni tel dawn a, inkhel pawimawh leh boruak sang bik player tan hming chherna hun ṭha a ni dawn. Inkhelh hun hi Inrinni a nih bakah zan a nih lehzel avangin tualchhung football ngainatute tan hun insiam a awl dawn a, RG Stadium-a football kûtpui hi football ngainatute tan chuan hmaih phal chi a ni lo.