Ten Hag hma hun a chiang lo: United an ngawi!

Manchester United-in tun season-ah league match sarih an khel tawh a, vawi hnih chiah an la chak - vawi hnih draw an nei a, vawi thum an tlawm. United ang club lian inti tan chuan result chhe tawpkhawk a ni.

Coach Erik ten Hag erawhin chhuanlam tur a nei zel a, Dutch coach hian team indinthar mek an nih avangin a awlsam loh thu a sawi. Mahse, Dutch coach hian season hnih chu Red Devils a kaihruai tawh a, hun mamawh anga a la insawi cheu hi chu club lian dang chu ni se, an ban tawh hial ang.

Mahse, United-in tun thlengin thawm an la nei lo a, Ten Hag-a ban leh ban loh chungchangah a inti hria apiang chu 'hre ril' a pawm mai an ngai rih! United hian thla tinin board meeting an nei ṭhin a, club hmalakna leh kal zel dan tur an sawi ṭhin.

Thawhlehni khan London khawpuiah Manchester United board an ṭhukhawm leh ngei a, hetah hian coach Erik ten Hag-a hma hun chungchang an sawi dawn nia sawi a ni. Mahse, tun thlengin thuthar a awm lo a, United board an reh tlat - fan-ten zawhna inzawh mai loh chu tih theih an nei lo.

Thawnthu hmasa

Season hmasa khan United hi Dutch coach nena inṭhen tura sawi rik a ni tawh. Mahse, Ten Hag-a hoin Red Devils hian FA Cup nomawi an chawi a, an champion aṭanga kar hnih hnu lawkah board lam chuan Ten Hag-a cham tur thu an puang.

Hetihlai hian United hi Thomas Tuchel nen pawh sawizawm a ni a, mahse, Bayern Munich boss hlui hian chawlh hahdam duh a rih avangin United sawmna a hnar. Tuchel bakah hian Tottenham Hotspur boss hlui Mauricio Pochettino, Brentford coach Thomas Frank, Graham Potter leh England boss Gareth Southgate thlengin an lam ri.

Mahse, United hian duhthlan tur an neihte uluk taka an thlir hnuah ETH chelh an rel a, a contract neih sa bakah, kum khat dang pawhsei theihna dan an neih chu tinungin, kum 2026 thleng an hnena cham turin an thlung nghet.

United hian ETH an chelh rualin amah puitu lam erawh an thlak thung a, assistant manager Mitchell van der Gaag leh coach Steve McClaren te chhuahtirin, coaching staff thar an pe a, thil a inthlak danglam an beisei.

Mahse maw...

United tan hian chawlh la mek Dan Ashworth leh Omar Berrada te pawh sporting director leh chief executive hna thawk turin an lo kir a, December 24-a United-a share leitu Sir Jim Ratcliffe leh a thawhpuite chuan an kalphung ṭhenkhat her rem hian team a puih theih an beisei.

Mahse, United besei ang erawhin thil a kal lo. Season hmasaa pariatna ni chunga Premier League mangṭhatu United hi vawi thum an tlawm zinga vawi hnihah hian 3-0 in an tlawm a, heti zata an hneh loh team pahnih hi an hmelma Liverpool leh Spurs a ni a, Old Trafford-ah ve ve a ni bawk.

Hetiang a nih avang hian Ten Hag-a chungchang sawi rik a ni leh ta a, amah lam inringtawk viau mah se, fans lamin rin an harsat tawh. Spurs laka an tlawm hnu lawkah United thuneituten Ten Hag chu an hmabaka FC Porto leh Aston Villa an hmachhawn turah an coach a la nih tur thu an sawi - a hnu lam erawh an sawi lo!

United hian Europa League-ah Porto an hmachhawn ta ngei a, 3-3 in an inhnehtawkpui. Premier League-ah Aston Villa chu khualmualah an lenchilh a, 0-0 in an inhnehtawk - United thuneitute an reh zui.

Ka thu lo!

Kar hmasa khan Ratcliffe chu Ten Hag-a la rin leh rin loh zawk a ni a, mahse, British sumdawng hausa hian, "He zawhna hi chhan ka duh lo. Erik hi ka ngaina a, coach ṭha tak a niin ka hria. Mahse, a chungchang thua thutlukna siam tur ka ni lo.

"Manchester United enkawltu management team kan nei a, anni hian kawng tinrengah kan kal zel dana ṭha leh ṭha loah thutlukna an siam zel ang. Engpawh ni se, uluk takin an ngaihtuahna an seng ang a, thutlukna an siam ang," a ti.

Ratcliffe hian sawi zawmin, "Kan tum chu a chiang - Manchester United hi a awmna ngaia hlan let leh kan duh a, kan duh ang tak a la ni lo tih erawh thil chiangsa a ni," a ti a, he thu a sawi lai hi Villa nena an inkhelh hma a ni.

Hei vang hian media ṭhenkhat chuan Villa nena an inkhelh zawhah thutlukna an siam dawn tihnaah an ngai a, Unai Emery enkawl team laka an chak zawh loh ṭum hian Ratcliffe, Berrada leh Ashworth bakah Sir Alex Ferguson-te chuan a hmunah an en.

A harsa

United-in an league match hmasa pasarih aṭangin point riat chiah an hmu a, 1989-90 season hnua an league match hmasa pasarih aṭanga point an hmuh chhiat ber ṭum a ni. Mahse, tun thlengin ETH chungchangah thawm a awm thei lo.

Villa nena an inhnehtawk zawh khan Dutch coach hian club neituten an thlawp leh thlawp loh chungchang chu BBC Sports hnenah a sawi chhuak a, "Min thlawp leh thlawp loh engmah sawi theih ka nei lo.

"Min rin tawk loh chuan min hrilh ngei ka ring - tlang takin kan indawr ṭhin a, kan karah engmah a awm ngai lo," a ti a, hemi hnu hian club thuneitute an ṭawngchhuah beisei ni mah se, Ten Hag an thlawpna emaw thlawp lohna hriat tur a awm lo a, an ngawi tlat.

Tun dinhmunah chuan a hre ber a awm theih rih loh a, inrinsiak hun lai United fan-ten an tawng ṭha leh a ni ber - Ten Hag hma hun a chiang lo a, chhuak ta se, tuin nge thlak ang? tih ringawt pawh hi lu tihai tham chu a ni sa hrim hrim.