England an chesual - Greece an ngam lo

UEFA Nations League-ah Ningani zan khan England an inlan a, European football-a team vantlang Greece an ngam lo. I chhiar dik e, Wembley Stadium-ah ngei England an tlawm a, an ngam loh chu rin hlawh lo zawk Greece an ni.

Greece hian 2-1 in England hi an hneh a, Benfica forward Vangelis Pavlidis chuan goal hnih a khung. England tan Jude Bellingham chuan goal khat khung ve mah se awmzia a nei phak lo a, an tlawm.

Season hmasa an chet chhiat avanga League B lama tla England tan tun season Nations League-a an tlawm hmasak ber a ni a, match thum an khelh aṭangin point ruk an nei - Greece erawh an la chak vek a, group hmahruaitu an ni.

England coach lailawk Lee Carsley-a'n Greece a zuam sual tiin a sawi theih a, mikhual team lakah 'risk' laa attacking player rual a luhtir avangin England an tlawm. Three Lions hian ngawrh lehzualin coach tur an zawn chhunzawm ang.

A tak ram

England-in hliam vangin captain Harry Kane an chhawr thei lo a, Carsley-a'n striker Ollie Watkins leh Dominic Solanke nei reng mah se, false nine atan Jude Bellingham leh Phil Foden hman a thlang a, attacking player rual a luhtir ṭhawt!

Midfield-ah Cole Palmer a awm a, Declan Rice nen an inkawp. Bukayo Saka leh Anthony Gordon te chu mual sir aṭanga nawr turin an lut bawk a, hei hi England tihsual langsar tia sawi ngam a ni.

Goal nawr nuam ti ṭha panga an lut rual a, midfield a ruak a, Greece lamin duhtawkin he hmun ruak hi an chhawr ṭangkai. Arsenal midfielder Rice chu ṭum dang zawng aia a thawhrim lehzual a ngai a, a ṭhiante a hum vek seng bik lo a ni ber!

Hetihlai hian Greece erawh an game plan-ah an chiang a, an hmuhnawm. Tasos Bakasetas khung ngei tur nia lang Levi Colwill-a'n goal line aṭanga a lo pet chhuak hmante chu England vanneihna a ni.

Mahse maw...

Vanneihnain England a chhanhim reng thei lo - second half ṭan aṭanga minute lina lekah Pavlidis chuan Greece goal hmahruai a khung a, a finishing a tawih hle. Pavlidis hian a goal hmahruai hi a ṭhianpa Baldock tan a hlan zui.

Greece international George Baldock chu Nilaini khan a thi a, Greece player-te hian Sheffield United player hlui hriat reng nan hian puan dumin an ban an hreng. Pavlidis hian goal a khung zawhah a ban hrenna chu a kawk a, Baldock hming chuanna jersey a pholang bawk.

Carsley-a'n thutlukna a siam sual tih inhriain Gordon leh Foden a la chhuak a, an aiah Villa striker Watkins leh Tottenham Hotspur striker Solanke te an lut - minute 87-naah Solanke hian Bellingham khung tur a siamsak nghal a, 1-1 a ni.

Mahse, chak phu zawk Greece an beidawng duh lo. Hun pek belh minute linaah Pavlidis bawkin Wembley Stadium ngawihtirin goal a khung leh a, Three Lions tan chhanletna tur hun a awm tawh loh avangin England an chak.