Semifinal-ah Fritz a lut

Nimin tlai khan Taylor Fritz chuan David Goffin a hneh a, inelna neih lai Rolex Shanghai Masters-ah semifinal a inhlangkai - final lut tur chuan Novak Djokovic leh Jakub Mensík te inkhela chak zawk a paltlang leh a ngai ang.

China rama inelna neih mekah Fritz hi a khel ṭha thei hle a, match li a khelh tawhah set a la hloh miah lo. Nimin tlai inkhelah pawh hian darkar khat leh minute 22 chhungin 6-3, 6-3 in a chak.

Hard court tournament bikah chuan Fritz hian Masters 1000 huangah semifinal a thlen vawi thumna chauh a la ni a, a dinhmun tur tak hriatthiam a la harsa rih hle, a khelh chhoh dan thlir erawh chuan beisei a nei sang ngam ang.

American tlangval Fritz chuan, "Match kan khelh hmain ruahmanna ka nei ṭha sa hle a, chumi ang chuan tinghal vek thei lo mah ila ṭha tawk takin ka tithei a, a tir aṭanga a hmawr ka bawk danah ka lawm hle a ni," a ti.

Nimin tlai khan Djokovic leh Mensík ten quarterfinal match hnuhnung ber an khel a, result erawh kan hre hman lo. Semifinal lehlamah Jannik Sinner leh Tomas Machac te chu vawiin tlai hian an inhmachhawn thung ang.