Chile hnehtu Brazil

South American World Cup qualifier khelh laiah, nimin zing khan Brazil chuan an mikhualna ramah Chile chu 2-1 in an hneh a, football inelna boruak lian bera inlan turin kawng dik an zawh ve leh ta.

Estadio Nacional Julio Martínez Pradanos-a inkhelah, mualneitu Chile tan Eduardo Vargas chuan ṭan aṭanga minute hnihna lekah goal hmahruai a khung a, mikhual lamin chawlhlawk hmain Igor Jesus hmangin an chhanglet.

Kum 23 mi Igor Jesus hi ram tan a inlan vawi khatna a ni a, goal a khung nghal. Match dang ang bawkin Brazil an chak zo lo leh mai dawnin a lang hman, mahse hun tawp dawnah substitute Luiz Henrique chuan chakna goal a khung.

South America ram 10 zinga parukte chu World Cup 2026 atan an tling nghal dawn, pasarihna chuan playoff an khel ang. Brazil pawh point 13 nen palinaah an inhlangkai a, Nilaini zingah tho Peru an mikhual thung dawn a ni.

Inkhel dangah Lionel Messi awmna Argentina an chak zo lo - world champion hi an mikhualna ramah Venezuela nen 1-1 in an inhnehtawk a ni. Defender Nicolas Otamendi-a goal an venhim theih loh avangin point khatah an lungawi a ngai.

Lionel Scaloni naute hian match kua aṭanga point 19 hmuin hma an la hruai tho a, anmahni hnaih bertu Colombia chuan khelh zat inangah point thumin an phak lo. Argentina hian Nilaini zingah Bolivia an mikhual zui leh ang.

Argentina captain Messi chuan, "Khelmualah khan tui a tling tam em em mai a, vawi hnih vel bak kha ball kan in pass dik thei lo. A nihna takah chuan hetiang dinhmunah chuan inkhelh a harsa a ni, kan tan kawng a awlsam lo," a ti.

Thlipui leh ruah vangin khelmual a huh nasa a, tui tlingte paih ni mah se khelmualah tui a la tam tho a, a lira ball in pek a harsa hle a ni. Argentina defender Rodrigo De Paul pawhin tui tling tam chu an harsatna a nih thu a sawi ve bawk.